काठमाडौं, मंसिर ९ । म्यानचेस्टर सिटी प्रिमियर लिगमा टोटनहम हटस्परसंग फराकिलो गोलअन्तरले पराजित भएको छ ।
सनिवार राति भएको खेलमा साविक विजेता समेत रहेको म्यानचेस्टर सिटी टोटनहम हटस्परसंग ४–० को फराकिलो गोलअन्तरले पराजित भएको हो ।
सिटीको घरेलु मैदान इतिहाद रंगशालामा भएको खेलमा बलियो सिटीलाई पराजित गर्न जेम्स म्याडिसनले दुई गोल गर्दा पेड्रो पोरो र ब्रेनान जोनसनले एक–एक गोल थपे ।
खेल सुरु भएको १३ औं मिनेटमा डिजेन कुलुसेभ्स्कीको पासमा म्याडिसनले गोल गर्दै भ्रमणकारी टोलीलाई सुरुवाती अग्रता दिलाए ।
त्यसपछि २० औं मिनेटमा सन ह्युङ मिनको पासमा म्याडिसनले व्यक्तिगत रुपमा दोस्रो गोल थप्दा स्पर्सका रुपमा समेत चिनिने टोटनहम २–० ले अघि बढ्यो ।
यता, दोस्रो हाफको ५२ औं मिनेटमा डोमिनिक सोलान्केको पासमा पोरोले गोल थप्दा स्पर्स ३–० को आरामदायी अग्रता सहित अघि बढ्यो ।
त्यस्तै, खेलको इन्जुरी समयको तेस्रो मिनेटमा टिमो वार्नरको पासमा जोनसनले गोल थप्दा टोटनहम ४–० ले विजयी भयो ।
फराकिलो जितसंगै टोटनहमले १२ खेलबाट १९ अंक जोडेर लिग तालिकाको छैटौं स्थानमा उक्लिएको छ । पराजित सिटीको भने समान १२ खेलबाट २३ अंकसहित तालिकाको दोस्रो स्थानमा रहेको छ ।
Published Date: 24 November 2024
