काठमाडौं, कार्तिक २४ । आईसीसी यु-१९ महिला टि-२० विश्वकप एसिया छनोटअन्तर्गत नेपालले आज आफ्नो तेस्रो खेल युनाइटेड अरब इमिरेट्स (युएई)विरुद्व खेल्ने भएको छ ।
नेपालले तेस्रो खेलमा शनिवार युएईको सामना गर्दैछ । नेपाल र घरेलु टोलीबीचको खेल युएईको अजमानमा नेपाली समय अनुसार बिहान ११ः१५ बजे सुरु हुनेछ । नेपाल र युएई दुवैको यो तेस्रो खेल हो ।
दुवै टोलीले थाइल्याण्ड र कुवेतमाथि फराकिलो जित हासिल गरेका थिए । नेपालले पहिलो खेलमा थाइल्याण्डलाई ६७ रनले पराजित गरेको थियो । दाोस्रो खेलमा कुवेतलाई १ सय ८ रनको फराकिलो अन्तरले पराजित गरेको थियो ।
उता, युएईले पहिलो खेलमा कुवेतलाई १ सय ६ रनको फराकिलो अन्तरले पराजित गरेको थियो । दोस्रो खेलमा युएईले थाइल्याण्डलाई ७४ रनले पराजित गरेको थियो ।
कात्तिक २९ गते सम्म चल्ने प्रतियोगितामा नेपाल, घरेलु टोली, कुवेत र थाइल्याण्डको सहभागिता छ । नेपालको चौथो खेल कात्तिक २५ गते थाइल्यान्डसँग हुनेछ । पाँचौं खेलमा कात्तिक २७ गते कुवेतसँग खेल्ने नेपालको अन्तिम खेलमा कात्तिक २८ गते युएईसँग रहेको छ।
छनोटको शीर्ष टोली विश्व कपका लागि छनोट हुनेछ । विश्व कप अर्को वर्ष मलेसियामा आयोजना हुँदैछ ।
नेपाली टोली
सोनी पाख्रिन, मनिषा उपाध्याय, कृष्मा गुरुङ, साना प्रविन, स्नेहा महरा, साबित्रा धामी, तृषना विक, रिया शर्मा, अलिशा कुमारी यादव, पूजा महतो, कुसुम गोदार, सिमाना केसी, ज्योत्सिका मरासिनी, रचना चौधरी
Published Date: 09 November 2024
