काठमाडौँ, कार्तिक ८ । राफिन्हाको ह्याट्रिकसँगै स्पेनिस क्लब बार्सिलोनाले च्याम्पियन लिगमा जर्मन क्लब बायर्न म्युनिखमाथि जित हात पारेको छ । लगातार दोस्रो जित हात पार्ने क्रममा बार्सिलोनाले बायर्नलाई ४–१ ले पराजित गरेको हो ।
घरेलु मैदानमा भएको खेलमा बार्सिलोनाको जितमा राफिन्हाले ह्याट्रिक पूरा गर्दा रोबर्ट लेवान्डोस्कीले १ गोल गरे । पाहुना टोलीका लागि ह्यारी केनले १ गोल फर्काए ।
खेलको पहिलो मिनेटमै गोल गर्दै राफिन्हाले बार्सिलोनालाई सुरुवाती अग्रता दिलाएका थिए । केनले १८औं मिनेटमा गोल गर्दै बायर्नलाई खेलमा फर्काए ।
२७औं मिनेटमा लेवान्डोस्कीले गोल गरेसँगै बार्सिलोनाले फेरी अग्रता लिन सफल भयो । खेलको ४५औं मिनेटमा राफिन्हाले व्यक्तिगत दोस्रो र टोलीका लागि तेस्रो गोल गरे ।
५६औं मिनेटमा गोल गर्दै राफिन्हाले ह्याट्रिक पूरा गर्दै बार्सिलोनलाई ४-१ को सहज जित दिलाए ।
लगातार दोस्रो जितसँगै बार्सिलोना ३ खेलबाट ६ अंकका साथ १०औं स्थानमा छ । लगातार दोस्रो हार बेहोरेको बायर्न समान खेलमा ३ अंकसहित २३औं स्थानमा छ ।–एजेन्सी
Published Date: 24 October 2024
