काठमाडौं, असोज ३० । रेडियो नेपालले दनुवार भाषामा समाचार प्रसारण गर्न सुरु गरेको छ ।
मंगलबार नेपाल सरकारका प्रवक्ता एवं सूचना तथा प्रविधि मन्त्री पृथ्वी गुरुङबाट दनुवार भाषाको समाचार शुभारम्भ गर्दै रेडियो नेपालले २५ भाषामा समाचार दिन थालेको हो ।
यस अघि विभिन्न २४ राष्ट्रभाषामा समाचार दिँदै आएको रेडियो नेपालले अल्पसङ्ख्यामा रहेका दनुवार भाषामा समेत समाचार दिन सुरु गरेको रेडियो नेपालका कार्यकारी निर्देशक अमरध्वज लामाले बताए।
कार्यक्रममा बोल्दै संचारमन्त्री गुरुङले राज्यका हरेक क्षेत्रमा समावेशी र समानुपातिक बनाउनका लागि टुक्रा टुक्रामा छरिएर रहेका मालाहरूलाई उन्नुपर्ने बताए । उनले स्रोत र सत्तामा समानुपातिक मिलाउन सके मात्र देशको राष्ट्रियता मजबुत हुने बताए । मन्त्री गुरुङले राष्ट्रिय एकताको प्रर्वद्घन गर्नका लागि सबै जातजाति, भाषाभाषी, धर्मावलम्बी र लिंग क्षेत्रलाई अधिकार सम्पन्न बनाउन आवश्यक रहेको बताए । सङ्घीयताको मर्म भनेकै नेपालमा छरिएर रहेका विभिन्न जात, जाति भाषा, भाषी, क्षेत्र र सप्रदाय सबैलाई अधिकार दिई एउटै मालामा उन्नु रहेको बताए।
मन्त्रालयका सचिव अर्यालको सभापतित्वमा भएको कार्यक्रममा रेडियो नेपालका कार्यकारी निर्देशक अमरध्वज लामाले अतिथिहरूलाई स्वागत गर्दै कार्यक्रमबारे जानकारी गराएका थिए ।
रेडियो नेपालले दनुवार जागरण समितिको अनुरोध र भाषा आयोगको सिफारिसलाई ध्यानमा राख्दै बाग्मती प्रादेशिक प्रसारण केन्द्रबाट दनुवार भाषामा समाचार प्रसारणको सुरु गरेको हो। दनुवार भाषा नेपालका ६२ जिल्लामा बोलिने लोपोन्मुख भाषा हो । यो भाषा काभ्रेपलाञ्चोक, सिन्धुली, सिराहा, सर्लाही, धनुषा, लगायतका जिल्लामा बस्ने दनुवार समुदायका मानिसहरूले बोल्ने गर्दछन् ।
रेडियो नेपालले भाषा, विषयवस्तु, र जनशक्ति सबैमा थप समावेशी बन्ने उद्देश्यकासाथ यो नयाँ पहल सुरु गरेको जनाएको छ ।
