काठमाडौं, असोज १० । नेपाली राष्ट्रिय टोलीका सदस्य सन्दीप लामिछानेले अन्तर्राष्ट्रिय क्रिकेट काउन्सिल (आईसीसी) को विश्व वरीयातामा एकै पटक २२ स्थान सुधार गरेका छन् । एक दिवसीय क्रिकेटको अलराउण्डरमा उनले ठूलो छलाङ मारेका हुन् ।
आईसीसीले जारी गरेको पछिल्लो वरीयतामा सन्दीप ४१ औं स्थानमा पुगेका छन् । एकैपल्ट २२ स्थान सुधार गरेका उनी समान १४७ अंकसहित अस्ट्रेलियाका एडम जाम्पा र ट्राभिस हेडसँगै ४१औं स्थानमा पुगेका हुन् । बलिङतर्फको वरियतामा भने सन्दीप ४८औं स्थानमा यथावत छन् ।
अलराउण्डर वरीयतामा नेपालका दीपेन्द्र सिंह ऐरी ४८ औं, कुशल मल्ल ५१ औं तथा सोमपाल कामी ५३ औं स्थानमा छन् । यस्तै करण केसी ७६औं र गुल्शन झा ९१औं स्थानमा छन् । करणको यो ११ स्थान र गुल्शनको १३ स्थान सुधार हो । ब्याटिङ तर्फ आसिफ शेख ११ स्थान तल झर्दै ७९औं स्थानमा र कुशल भुर्तेल ४ स्थान तल झर्दै ८०औं स्थानमा पुगेका छन् । नेपाली टिम भने एक स्थान तल झर्दै १७ औं नम्बरमा ओर्लिएको छ । क्यानडाले वरीयतामा एकै पटक ४ स्थान सुधार गरेको छ ।
