बंगलादेशमा अन्तरिम सरकार बनाउने सेना प्रमुखको घोषणा

ढाका, साउन २१ । बंगलादेशमा अन्तरिम सरकार बन्ने भएको छ । सेना प्रमुख वकार–उज–जमानले सञ्चारमाध्यमहरुलाई सम्बोधन गर्दै बंगलादेशमा अन्तरिम सरकार बनाउने घोषणा गरेका हुन् । ‘सबै राजनीतिक दलसँगको फलदायी छलफलपछि हामीले अन्तरिम सरकार बनाउने निर्णय गरेका छौं । हामी अहिले राष्ट्रपति मोहम्मद शाहबुद्दीनसँग कुरा गर्नेछौं ताकि स्थिति समाधान गर्न सकियोस्’ उनले भनेका छन् ।

ढाका ट्रिब्युनका अनुसार उनले आन्दोलनको नाममा हुने सबै हिंसा बन्द गर्न आह्वान गर्दै विभेद विरोधी विद्यार्थी आन्दोलनका क्रममा भएका सबै मृत्युको नयाँ सरकारले न्याय सुनिश्चित गर्ने वाचा गरेका छन् । ढाका विश्वविद्यालयको कानुन विभागका प्रोफेसर आसिफ नजरुललाई विज्ञप्ति जारी गरी विद्यार्थीलाई आन्दोलन फिर्ता लिन अनुरोध गर्न भनिएको छ ।

जनरल वाकरले शेख हसिनाले आफ्नो पदबाट राजीनामा दिएर देश छाडेको बताएका छन् । उनले सेनाको मुख्यालयमा राजनीतिक दलसँगको बैठकमा अवामी लिगका कुनै पनि सदस्य नरहेको बताएका छन् । प्रधानमन्त्री हसिनाले सोमबार पदबाट राजीनामा दिएर देश छाडेकी छिन् । उनी चढेको हेलिकोप्टर भारतको अगरताला प्रस्थान गरेको बीबीसीले जानकारी दिएको छ ।  उनी बहिनीसँगै त्यसतर्फ उडेकी हुन् ।

प्रदर्शनकारीहरू सोमबार प्रधानमन्त्री निवासमै प्रवेश गरेका छन् । निवासमै छिरेपछि असुरक्षित महसुस गरेकी हसिनाले बहिनीसँगै देश छाडेको स्रोतलाई उद्धृत गर्दै एजेन्सीहरूले उल्लेख गरेका छन् । जुलाई पहिलो सातादेखि बंगलादेशमा आरक्षणविरोधी आन्दोलन सुरू भएको थियो । उक्त आन्दोलन अहिले सरकारविरुद्ध मोडिएको छ ।आन्दोलनकारीको माग केही सम्बोधन गरिए पनि पछिल्लो समय प्रधानमन्त्री हसिनाको राजीनामा माग गर्दै आन्दोलन उग्र बनेको हो । बंगलादेशमा जारी आन्दोलनमा हालसम्म तीन सयको मृत्यु भएको छ ।