काठमाडौँ, साउन २१ । लिग चरणको आफ्नो अन्तिम खेलमा नेपाली अलराउन्डर दीपेन्द्र सिंह ऐरी र लेग स्पिनर सन्दीप लामिछाने आबद्ध भेनकुवर नाईट्सले सान्त्वना जित निकालेको छ ।
लिग चरणको अन्तिम खेलमा सोमबार पहिलो जित निकाल्ने क्रममा भेनकुवरले मोन्ट्रियल टाइगर्सलाई पराजित गरेको हो ।
भेनकुवरले मोन्ट्रियल टाइगर्समाथि ५ विकेटको जित हात पारेको थियो । टाइगर्सले दिएको १ सय १० रनको लक्ष्य भेनकुवरले १८.४ ओभरमा ५ विकेट गुमाएर पूरा गर्यो ।
भेनकुवरको जितमा रिजा हेनरिक्सले सर्वाधिक ३९, कप्तान उस्मान ख्वाजाले ३१, रिचि बेरिङ्टनले १७, आसिफ अलिले ६ रन जोडे ।
नेपाली अलराउन्डर दीपेन्द्र भने शुन्य रनमा अविजित रहे । टाइगर्सका लागि गेहार्ड इरास्मस र अजमतुल्लाह उमरजाईले समान २ विकेट लिए ।
त्यसअघि टस हारेर पहिले ब्याटिङ गरेको टाइगर्सले १९.२ ओभरमा अल आउट हुदै मात्र १ सय ९ रन बनाएको थियो । भेनकुवरको जितमा सन्दीपले ३.२ ओभरमा १४ रन खर्चिएर २ विकेट लिए ।
सन्दीपले सर्वाधिक ३० रन बनाएका टाइगर्सका अजमतुल्लाह उमरजाईलाई ३० रनमा आउट गराए । दोस्रो विकेटका रुपमा जाहुर खानलाई ३ रनमा आउट गराए । बलिङको अवसर पाएका दीपेन्द्रले १ ओभरमा १२ रन खर्चिएर कुनै विकेट लिन सकेनन् ।
भेनकुवरले ६ टोली सहभागी प्रतियोगितामा ३ अंकका साथ अंक तालिकाको पुछारमा रहेर लिग सकाएको छ ।
Published Date: 05 August 2024
