नाउपाले फिर्ता लियो सरकारलाई दिएको समर्थन, विश्वासको मत पनि नदिने

काठमाडौं, असार २६ । नागरिक उन्मुक्ति पार्टी (नाउपा) ले सरकारलाई दिएको समर्थन फिर्ता लिएको छ । आज (बुधबार) सिंहदरवारस्थित संसदीय दलको कार्यालयमा बसेको बैठकले पुष्पकमल दाहाल ‘प्रचण्ड’ नेतृत्वको सरकारलाई दिएको समर्थन फिर्ता लिएको संसदीय दलका नेता गंगाराम चौधरीले जानकारी दिए ।

समर्थन फिर्ता लिएको पत्र बिहीबार बुझाइने उनले बताएका छन् । ‘सरकारलाई दिएको समर्थन फिर्ता लिएका छौं । भोलि पत्र पनि बुझाउँछौं,’ उनले भने । यससँगै प्रधानमन्त्री प्रचण्डले नागरिक उन्मुक्तिका सांसदको विश्वासको मत पनि नपाउने भएका छन् ।

नेकपा एमाले र नेपाली कांग्रेसबीच राष्ट्रिय सहमतिको सरकार बन्ने भएपछि नागरिक उन्मुक्तिले समर्थन फिर्ता लिएको हो । पार्टीका संरक्षक रेशम चौधरीले यसअघि नै राष्ट्रिय सहमतिको सरकारमा सहभागी हुने बताइसकेका छन् । उनले कांग्रेस सभापति शेरबहादुर देउवासँग छलफल गरेर राष्ट्रिय सहमतिको सरकारमा सहभागी हुने प्रतिवद्धता जनाएका थिए । बैठकमा तीन सांसदको मात्र उपस्थिति थियो । रञ्जिता श्रेष्ठ बैठकमा सहभागी थिइनन् ।