काठमाडौं, माघ १९ । देशका विभिन्न भागमा पटक पटक आत्मदाहका घटना भइरहेकामा सांसदहरुले चिन्ता व्यक्त गरेका छन् ।
बुधबारको प्रतिनिधिसभाको बैठकमा समय लिँदै नेपाली काँग्रेसका महामन्त्री गगनकुमार थापाले बर्डफ्लु नियन्त्रणका लागि कुखुरा नष्ट भएका साना किसानलाई सरकारले क्षतिपूर्ति दिन माग गरेका छन् । प्रतिनिधिसभामा शून्य समयमा बोल्दै महासचिव थापाले बैंकको ऋण तिर्न नसक्दा मर्कामा परेका किसानको समस्या बुझ्न सरकारलाई आग्रह गर्नुभयो ।
बर्डफ्लु नियन्त्रणका लागि कुखुरा नष्ट भएका किसानलाई सरकारले ५८ करोड रुपैयाँ मुआब्जा दिनुपर्ने थापाले बताए । उनले यो रकम भुक्तानीमा ढिलाइ नगर्न सरकारसँग आग्रह गरे ।
त्यस्तै स्वतन्त्र सांसद डा अमरेशकुमार सिंहले आत्मदाह र आत्महत्या प्रकरणको छानबिन गर्न उच्चस्तरीय न्यायिक छानबिन समिति गठन गर्न माग गरेका छन् ।
जनता समाजवादी पार्टीका सांसद राजकिशोर यादवले आत्महत्या गरेका युवा व्यवसायी प्रेमप्रसाद आचार्यको बारेमा संसदमा आवाज नउठ्नु दुःखद भएको बताए । उनले भने, ‘आज हामी संसदमा बहस गरिरहेका छौं । यो देशमा सफल हुन नसकेपछि एक युवाले आत्मदाह गरेका छन् । आज यो सदनमा विशेष प्रस्ताव आउँछ कि प्रेम आचार्यलाई किन आत्मदाह गर्न बाध्य पारियो ? यसबारे छलफल हुन सक्छ, तर आज यो संसद मृत शरीरको रूपमा स्थापित भएको छ।
नेपाली कांग्रेसका सांसद मोहन बस्नेतले प्रेम आचार्यकी श्रीमतीलाई जागिर दिने घोषणा गरेका छन् । उनले काम सकेर फर्किएपछि रोजगारीका लागि नियुक्ति पत्र दिने बताए ।
Published Date: 02 February 2023
