मुम्बई, असार १३ । सन् ९० को दशकमा सफलताको शिखरमा पुगेकी अभिनेत्री करिश्मा कपूर अहिले ५० वर्ष पुगेकी छिन् । करिश्माको करियरमा एउटा त्यस्तो समय पनि आएको थियो, जति बेला हरेक वर्ष उनका १०–१२ वटा फिल्महरु प्रदर्शनमात्र हुन्थेनन्, सबै फिल्महरु सुपरहिट नै हुन्थे ।
करिश्माले सन् २००३ मा व्यवसायी सञ्जय कपूरसंग विवाह गरेकी थिइन् । तर सन् २०१६ मा दुवैको सम्बन्ध विच्छेद भयो । करिश्माले श्रीमानले आफूलाई यातना दिएको आरोप लगाउँदै आएकी थिइन् ।
यद्यपि, करिश्माका श्रीमानले सन् २०१७ मा मोडल तथा अभिनेत्री प्रिया सचदेवसंग विवाह गरिसकेका छन् । तर करिश्मा अहिले पनि एक्लो जीवन बाँचिरहेकी छिन् । उनले दोस्रो विवाह गरेकी छैनन् ।
यसैबीच, करिश्माका वुबा रणधीर कपूर आफ्नी छोरीले दोस्रो विवाह नगर्नुको कारण खुलाएका छन् । उनी भन्छन् – ‘करिश्मा आफ्नो जिन्दगीमा सेटल र खुशी छिन् । मैले कहिले पनि उनलाई दोस्रो विवाह गर्नका लागि कुरा गरेको छैन । उनले दोस्रो विवाह गर्नु पर्छ जस्तो मलाई लाग्दैन ।’
यद्यपि, करिश्माले भविष्यमा दोस्रो विवाह गरिन् भने आफू उनको उक्त निर्णयमा साथ रहने र आशीर्वाद दिनेसमेत बताएका छन् ।
Published Date: 27 June 2024
