काठमाडौँ, असार ११ । युरोकपमा स्पेनले अपराजित रहँदै अन्तिम १६ मा स्थान बनाएको छ । गए राति समूह ‘बी’ अन्तर्गतको अन्तिम खेलमा अल्बानियालाई १–० गोल अन्तरले हराउँदै स्पेन ९ अंकका साथ प्रिक्वार्टर फाइनलमा पुगेको हो । स्पेनका लागि एक मात्र गोल खेलको ४३ औँ मिनेटमा फारेन टोनेसले गरे ।
गए राति नै भएको अर्को खेलमा अन्तिम मिनेटमा बराबरी गोल गर्दै साविक विजेता इटाली पनि अन्तिम १६ मा प्रवेश गरेको छ । इञ्युरी समयको अन्तिम समयमा एक गोलले पछि परेको अवस्थामा गोल गरेर क्रोएसियाविरुद्ध १–१ को बराबरी खेल्दै इटाली अन्तिम १६ मा पुगेको हो ।
क्रोएसियाले ५५औं मिनेटमा लुका मोड्रीचको गोलको मद्दतमा खेलमा अग्रता लिएको थियो । मोड्रिच गोल गर्नु केही समय अघि पेनाल्टी गोल गर्न असफल रहे । तर इञ्जुरी समयको आठौ मिनेटमा माटिया जाकाग्नीले उत्कृष्ट गोल गर्दै इटालीको अन्तिम १६ मा स्थान पक्का गरेका हुन् ।
क्रोएसियाको भने ३ खेलमा २ अंक मात्र भएको छ । तेस्रो भएको क्रोएसियाको उत्कृष्ट ४ तेस्रो स्थान हासिल गर्ने टोली बन्दै अर्को चरणमा पुग्ने सम्भावना न्यून रहेको छ । अल्बानिया भने १ अंकसहित समूहको पुछारमा रह्यो । प्रतियोगिता अन्तर्गत आज समूह ‘डी’ का अष्ट्रिया र नेदरल्याण्ड तथा फ्रान्स र पोल्याण्ड आमने सामने हुनेछन् ।
