काठमाडौँ, माघ १८ । सरकारले देशको प्रमुख प्रशासनिक परिसर सिंहदरबारभित्र भाडाका सवारी साधन प्रवेश गर्ने व्यवस्था गरेको छ । श्रम, रोजगार तथा सामाजिक सुरक्षामन्त्री डोलप्रसाद अर्यालले अपाङ्गता भएका व्यक्तिलाई सहज रुपमा भित्र्याउने व्यवस्था गरिएको जानकारी दिए ।
यसअघि देशको केन्द्रीय प्रशासनिक भवनभित्र सरकारी, निजी, कूटनीतिक र पर्यटकीय सवारी साधनलाई प्रवेश अनुमति दिइएको थियो । सरकारले सुरक्षा संवेदनशीलतालाई ध्यानमा राखी सिंहदरबारमा भाडामा लिइएका सवारीसाधन प्रवेशमा रोक लगाएको थियो ।
सिंहदरबारमा अपाङ्गता भएका व्यक्तिको प्रवेशमा सहजताका लागि गृह मन्त्रालयसँगको समन्वयमा यस्तो व्यवस्था गरिएको हो । राज्यले उपलब्ध गराएको परिचयपत्रका आधारमा विपन्न व्यक्ति बोकेका सवारी साधनलाई सुरक्षाकर्मीले प्रवेशमा सहजीकरण गर्ने जानकारी मन्त्री अर्यालले बताए ।
Published Date: 01 February 2023
