नयाँदिल्ली, जेठ २३ । सन् २०१४ र २०१९ मा लोकसभामा एक्लै स्पष्ट बहुमत ल्याएको भाजपाले यो निर्वाचनमा बहुमत ल्याउन असफल भयो । भाजपा नेतृत्वको गठबन्धन ‘एनडिए’ ले भने सरकार निर्माणका लागि स्पष्ट बहुमत ल्याएको छ ।
यो नतिजासँगै भारतले गठबन्धन सरकार पाउने निश्चित भएको छ । यो निर्वाचनको नतिजा सन् १९९१ को लोकसभाकै जस्तो देखिन्छ । सन् १९९१ मा कंग्रेसले २३२ सिट जित्दा पिभी नरसिंह राव प्रधानमन्त्री बनेका थिए । उनी नेतृत्वको गठबन्धन सरकार पूरै पाँच वर्ष चलेको पनि थियो । यस पटक भाजपा २४० सिटवरपर सीमित हुँदा गठबन्धन उसको बाध्यता बनेको छ ।
लोकसभा निर्वाचनको ५४३ स्थानकै नतिजा आउँदा कसले कति जिते ?
भारतमा सम्पन्न लोकसभा निर्वाचनको सबै चुनाव क्षेत्रको परिणाम सार्वजनिक भएको छ । हिन्दुस्तान टाइम्सका अनुसार भारतीय जनता पार्टी (भाजपा) नेतृत्वको नेसनल डेमोक्र्याटिक अलायन्स (एनडिए गठबन्धन) ले २९५ सिट जितेको छ । त्यस्तै कंग्रेस आईले नेतृत्व गरेको प्रतिपक्षी इन्डिया गठबन्धनले २३१ सिट जितेको छ । अरु पार्टीहरूले १७ सिट जितेका छन् ।
भारतीय जनता पार्टी नेतृत्वको एनडिए गठबन्धनले अघिल्लो पटक ३५२ स्थान जितेको थियो । उसले अघिल्लो पटक एक्लै ३०३ सिट जितेको थियो। यसपटक उसले ६१ स्थान गुमाएको छ । कंग्रेस आईले सन् २०१९ को निर्वाचनको तुलनामा उल्लेख्य सुधार गरेको छ ।
यीमध्ये महिला मतदाताको संख्या ३१ करोड २ लाख छ । यसपालि ५८.५८ प्रतिशत मतदान भएको थियो । भारतमा गत शनिबार अन्तिम चरणको मतदान सम्पन्न भएको थियो । त्यसअघि १९ अप्रिलमा पहिलो चरण, अप्रिल २६ दोस्रो चरणको, मे ७ मा तेस्रो चरण, मे १३ मा चौथो चरण, मे २० मा पाचौं चरण, मे २५ मा छैटौं चरणको मतदान भएको थियो ।
