काठमाडौं, माघ १७ । फ्रेन्च लिग वान फुटबलमा पेरिस सेन्ट जर्मन (पीएसजी)ले रेम्ससँग बराबरी खेल्दै अङ्क बाँडेको छ । घरेलु मैदानमा सोमबार राति भएको खेलमा पीएसजीले सुरुवाती अग्रता जोगाउन नसक्दा १–१ गोलको बराबरी खेल्दै अङ्क बाँडेको हो ।
५१औँ मिनेटमा नेयमारले गोल गर्दै पीएसजीलाई सुरुवाती अग्रता दिलाएको थियो । मार्को भेराट्टीले फल खेलेपटि रातो कार्ड पाउँदै बाहिरिए पछि पीएसजी ५९औँ मिनेटमा १० खेलाडीमा समेटियो ।
त्यसपछि खेलमा फर्किएको रेम्सले दोस्रो हाफको इन्जुरी समयमा बराबरी गोल फर्काएको थियो । रेम्सका लागि फोलारिन बालोगुनले गोल गर्दै खेललाई बराबरी गरेका थिए । बराबरीसँगै शीर्षस्थानमा पीएसजी यथावत् नै रहेको छ भने २६ अङ्क बनाएको रेम्स ११औँ स्थानमा छ । एजेन्सी
