काठमाडौँ, जेठ ६ । इन्डियन प्रीमियर लीग (आईपीएल) २०२४ को १७ औं सीजनको ६८ औं खेलमा रोयल च्यालेञ्जर्स बेंगलुरु (आरसीबी) ले चेन्नई सुपर किङ्स (सिएसके) लाई २७ रनले पराजित गरेको छ ।
यो जीतसंगै आरसीबीले प्लेअफमा प्रवेश पाएको छ । शनिवार राति बेंग्लुरुको चिन्नास्वामी स्टेडियममा खेलिएको यो रोमाञ्चक खेलमा चेन्नईले जीतका लागि २१९ रन बनाउनु पर्ने थियो, तर यो टीमले ७ विकेट गुमाएर १९१ रनमात्र बनाउन सक्यो ।
सनराइजर्स हैदराबाद, कोलकाता नाइट राइडर्स तथा राजस्थान रोयल्सले यसअघि नै प्लेअफमा आफ्ना स्थान सुरक्षित गरिसकेका छन् ।
आरसीबीले २१९ रनको विजयी लक्ष्य दिए पनि प्लेअफमा पुग्नका लागि चेन्नईले २०१ रनमात्र बनाउन पर्ने थियो । तर अन्तिम ओभरमा यश दयालले उत्कृष्ट बलिङ गर्दै आरसीबीको प्लेअफको प्रवेश सुनिश्चित गराए । यश दयालले उक्त ओभरमा एमएस धोनीलाई आउट गर्दै चेन्नईलाई प्लेअफमा पुग्नका लागि आवश्यक १७ रन बनाउन दिएनन् ।
चेन्न्ईका लागि रचिन रवीन्द्रले सबैभन्दा बढी ३७ बलमा ६१ रन बनाए । रवीन्द्रले त्यसक्रममा पाँच चौका तथा तीन छक्का प्रहार गरे । रवीन्द्र जडेजाले २२ बलमा अविजित ४२ रन बनाए, जसमा तीन चौका तथा तीन छक्का समावेश छन् । एमएस धोनीले १३ बलमा २५ रन बनाए । उनले तीन चौका तथा एक छक्का प्रहार गरे । यश दयालले आरसीसीका लागि सर्वाधिक दुई विकेट लिए ।
त्यसअघि टस हारेर पहिला ब्याटिङ गर्दै रोयल च्यालेञ्जर्स बैंगलुरुले ५ विकेटको क्षतिमा २१८ रन बनाएको थियो । कप्तान फाफ डु प्लेसिसले ३९ बलमा ५४ रन बनाए । पूर्व कप्तान विराट कोहलीले २९ बलमा ४७ रनको योगदान दिए । कोहलीले त्यसक्रममा तीन चौका तथा चार छक्का प्रहार गरे । कोहली–डु प्लेसिसका बीच पहिलो विकेटका लागि ७८ रनको साझेदारी भयो, जुन ठूलो स्कोरको आधार बन्यो ।
कोहली–डु प्लेसिसपछि क्याम्रुन ग्रीन तथा रजत पाटीदारले उत्कृष्ट प्रदर्शन गरे । ग्रीनले अविजित ३८ रन बनाए, जसका लागि उनले १८ बलको सामना गर्दै तीन छक्का तथा तीन चौका प्रहार गरे । पाटीदारले चार छक्का तथा दुई चौकाको सहयोगले २३ बलमा ४१ रनको योगदान दिए । दिनेश कात्र्तिकले १४ रन तथा ग्लेन म्याक्सेवेलले पनि १६ रनको योगदान दिँदै चेन्नईलाई विशाल लक्ष्य दिन सहयोग गरे । चेन्नईका लागि शार्दुल ठाकुरले दुई विकेट लिए ।
यो खेलमा पनि वर्षाले वाधा पुर्याएको थियो । वर्षाका कारण केही समय खेल रोकिए पनि खेल सुचारु हँुदा ओभर घटाउनु परेन । यदि वर्षाले खेल रद्द भएको अवस्थामा पनि चेन्नई १५ अंकसहित प्लेअफमा पुग्ने थियो । अर्कोतिर आरसीबीको टीम प्लेअफमा पुग्नका लागि कम्तिमा १८ रनको अन्तरले खेल जित्नु आवश्यक थियो, जुन उसले पुरा गरेर देखायो ।
