काठमाडौं, माघ १५ । नेपाल चेम्बर अफ कमर्सको आयोजनामा पर्यटन प्रवर्द्धनका लागि कर्पोरेट गल्फ प्रतियोगिता सम्पन्न भएको छ । काठमाडौंको सिनामंगलस्थित रोयल नेपाल गल्फ क्लबमा निजी क्षेत्रका उद्योगी व्यवसायीको सहभागितामा कर्पोरेट गल्फ प्रतियोगिता आयोजना गरिएको हो । सो प्रतियोगिताको समापन कार्यक्रमलाई सम्बोधन गर्दै चेम्बर अध्यक्ष राजेन्द्र मल्लले गल्फ प्रतियोगितालाई व्यवस्थित बनाएर मुलुकको पर्यटन प्रर्वद्धन गर्नुपर्नेमा जोड दिए । मल्लले आगामी दिनमा रोयल नेपाल गल्फ क्लबसँगको सहकार्यमा चेम्बरले गल्फ प्रतियोगितालाई निरन्तरता दिने स्पष्ट पारे ।
गल्फ क्लबका अध्यक्ष प्रचण्डमान श्रेष्ठले राज्यको साथ र नीतिगत व्यवस्था गरेर गल्फको विकास मार्फत पर्यटन प्रवर्द्धन गर्न सकिने बताउदै यसका लागि निजी क्षेत्रको सबै भन्दा पुरानो संस्था चेम्बरसँग १ सय वर्ष भन्दा पुरानो इतिहास बोकेको रोयल नेपाल गल्फ क्लब सहकार्य गर्न तयार रहेको स्पष्ट पारे ।
शनिबार सम्पन्न प्रतियोगिताका विजेतालाई चेम्बर अध्यक्ष मल्लले सम्मान समेत गरेको थियो । प्रतियोगीतामा पुरुषतर्फ नीतिममनी राजभण्डारी ४० उच्च स्कोर सहित पुरस्कृत भए । यसैगरी महिलातर्फ ३२ स्कोर सहित आर्सिया बानु पुरस्कृत भइन् । यस्तै चेम्बरको आमन्त्रित समूह तर्फबाट कान्तिपुर दैनिकका सहायक म्यानेजर किशोर बस्नेत ३५ स्कोर सहित पुरस्कृत भएका थिए ।
