काठमाडौं, वैशाख २४ । श्रेयस अय्यरको कप्तानीमा रहेको कोलकाता नाइट राइडर्स (केकेआर) ले सनसनी मच्चाएको छ । यो टीमले इन्डियन प्रीमियर लीग (आईपीएल) २०२४ को प्लेअफमा आफ्नो स्थान करिव सुरक्षित गरेको छ । टीमले यो उपलब्धि आइतवार राति लखनऊ सुपर जाइन्ट्सलाई ९८ रनले पराजित गर्दै हासिल गरेको हो ।
केकेआरले ११ मध्ये ८ खेलमा जीत हासिल गरेको छ । योसंगै केकेआर अंकतालिाकामा राजस्थान रोयल्सलाई पछाडि पार्दै शीर्ष स्थानमा उक्लिएको छ । अर्कोतिर लखनऊको टीमले अहिलेसम्म ११ मध्ये ६ खेलमा जित हासिल गर्दै अंकतालिकाको पाँचौं स्थानमा झरेको छ ।
केकेआर र लखनऊबीचको यो खेल लखनऊको इकाना स्टेडियममा खेलिएको थियो, जसमा टस हारेर पहिला ब्याटिङ गर्दै केकेआरले २३६ रनको विशाल लक्ष्य प्रस्तुत गर्यो । जवाफमा लखनऊको टीम १६.१ ओभरमा १३७ रनमै समेटियो ।
लखनऊ टीमका लागि मार्कस स्टोइनिसले सबैभन्दा बढी ३६ रन तथा कप्तान केएल राहुलले २५ रन बनाए । उनीहरुबाहेक अन्य कुनै पनि ब्याट्सम्यानले २० रनको आँकडा छुन सकेनन् । केकेआरका लागि हर्षित राणा तथा वरुण चक्रवर्तीले समान तीन विकेट लिए भने आन्द्रे रसेलले दुई विकेट लिए ।
टस हारेर पहिला ब्याटिङ गर्दै कोलकाताको टीमले ६ विकेटमा २३५ रन बनायो । ओपनर सुनील नरेनले २७ बलमै अर्धशतक बनाए । उनले फिल साल्टसंग मिलेर दोस्रो विकेटका लागि ४६ बलमा ७९ रनको साझेदारी गरे । सुनीलले ३९ बलमा ८१ रन बनाउँदै आउट भए । उनले आफ्नो इनिङमा ७ छक्का तथा छ चौका प्रहार गरे ।
साल्टले १४ बलमा ३२ रन जोडे भने अंगकृष रघुवंशीले पनि ३२ रन बनाए । खेलको अन्त्यमा कप्तान श्रेयस अय्यरले १५ बलमा २३ रन तथा रमनदीप सिंहले छ बलमा २५ रन जोडे । लखनऊका लागि नवीन उल हकले तीन विकेट लिए । रवि बिश्नोइ, यश ठाकुर तथा युद्धवीर सिंहले समान एक विकेट लिए ।
