नेपाल र वेष्ट इण्डिज ‘ए’ बीचको तेस्रो खेल आज

काठमाडौं, वैशाख १९ । नेपाल र वेष्ट इण्डिज ‘ए’ बीचको तेस्रो खेल आज (बुधबार) हुँदैछ । ५ खेलको टी–२० सिरिजको तेस्रो खेल आज त्रिवि क्रिकेट मैदानमा नेपाली समय अनुसार अपराहन्न १२ः १५ बजेदेखि सुरु हुनेछ ।

यस सिरिजमा नेपाल र वेस्ट इष्डिज ‘ए’ ले एक–एक खेल जितेका छन् र सिरिज १–१ को बराबरीमा रहेको छ । सिरिजको पहिलो खेलमा नेपालले ४ विकेटको जित हासिल गरेको थियो भने दोस्रो खेलमा वेष्ट इण्डिज ’ए’ ले १० रनको जित हासिल गरेको थियो ।

यस सिरिजका लागि नेपालले २० सदस्यीय टिम छानेको छ । टी–२० विश्वकपको टिम छनौट गर्न यस सिरिजलाई नेपालले अभ्यास खेलको रुपमा लिएको छ । नेपालले टी– २० विश्वकपको टिम सम्भवतः आजै सार्वजनिक गर्दैछ । आज टी–२० विश्वकपको टिम सार्वजनिक गर्न आईसीसीले दिएको डेडलाइनको अन्तिम दिन हो ।

नेपाली टिममा कप्तान रोहितसहित आसिफ सेख, कुशल भुर्तेल, अनिल शाह, आरिफ सेख, सन्दीप जोरा, दिपेन्द्र सिंह ऐरी, कुशल मल्ल, गुलशन झा, ललित राजबंशी, करण केसी, सोमपाल कामी, प्रतिस जिसी, अविनाश बोहोरा, बिबेक यादव, आकास चन्द, विनोद भण्डारी, सागर ढकाल, कमलसिंह ऐरी र लोकेश बम रहेका छन् ।