इलाम, चैत २४ । आउँदो वैशाख १५ मा हुने प्रतिनिधिसभाको उपनिर्वाचनका लागि इलाममा नेकपा एमालेले सुहाङ नेम्बाङको उम्मेद्वारी दर्ता गराएको छ । माओवादीले अघि सारेका उम्मेद्वार धिरेन्द्र शर्मा प्रस्तावक र एमालेकै रवीन्द्र सुवेदी समर्थक रहेर नेम्बाङको उम्मेद्वारी दर्ता भएको हो । उम्मेदवारी दर्ताअघि एमाले उम्मेदवार सुहाङले इलामको ठूलो टुँडिखेलस्थित शहीद रत्नकुमार वान्तवा, बम वान्तवा र आदिकवि भानुभक्त आचार्यको शालिकमा माल्यार्पण गरेका थिए ।
‘समर्थक र प्रस्तावकहरुसहित हामीले भर्खरै उम्मेद्वारी दर्ता गरायौं’, एमाले कोशीका अध्यक्ष घनश्याम खतिवडाले भने । संविधानसभा अध्यक्ष समेत रहेका सो क्षेत्रका सांसद सुवाषचन्द्र नेम्बाङको निधन भएपछि इलाम २ मा उपनिर्वाचन हुन लागेको हो । एमालेले नेम्बाङकै कान्छा छोरा सुहाङलाई उम्मेद्वारका रुपमा अघि सारेको छ । उनलाई माओवादी केन्द्रले पनि समर्थन गरेको छ ।
सुहाङसहित इलाममा उम्मेद्वारी दर्ता गर्नेको संख्या पाँच पुगेको छ । अहिलेसम्म सीके राउत नेतृत्वको जनमत पार्टीका तर्फबाट प्रेमकुमार थाम्सुहाङ, नेपाल मजदूर किसान पार्टीका श्यामकुमार दर्जी र मंगोल नेशनल अर्गनाइजेसनका तर्फबाट मनिकुमार लिम्बूले उम्मेद्वारी दर्ता गराएका छन् । स्वतन्त्र उम्मेद्वार डाकप्रसाद गौतमले पनि उम्मेद्वारी दर्ता गराएका छन् । डम्बर खड्कालाई उम्मेद्वार बनाएको नेपाली काँग्रेसले साढे २ बजे उम्मेद्वारी दर्ता गराउने छ । मिलन लिम्बू उम्मेद्वार रहेको राष्ट्रिय स्वतन्त्र पार्टीले केहीबेरमा उम्मेद्वारी दर्ता गराने जनाएको छ ।
Published Date: 06 April 2024
