काठमाडौँ, चैत २३ । नेपाली राष्ट्रिय टिमका लेग स्पिनर सन्दीप लामिछानेको बलात्कार मुद्दामा आज (शुक्रबार) पाटन उच्च अदालतमा पेशी रहेको छ । आज अदालतमा मुद्दाको पुनरावलोकन हुने की नहुने तय हुने छ । गत १३ पुसमा सन्दीपलाई जिल्ला अदालत काठमाडौंले बलत्कार मुद्दामा दोषी ठहर गरेको थियो ।
न्यायाधीश शिशिरराज ढकालको इजलासले सन्दीपलाई बलत्कार मुद्दामा दोषी ठहर गर्दै किशोरी नाबालिग रहेको फैसला गर्दै उनलाई ८ वर्ष कैद, ३ लाख जरिवाना र २ लाख क्षतिपुर्ति भराउन आदेश दिएको थियो । त्यसपछि सन्दीप १० फागुनमा जिल्ला अदालतको आदेशविरुद्ध पुनरावेदनका लागि उच्च अदालतमा पुगेका थिए । सन्दीप उच्च अदालत पुगेलगतै १ चैतमा सरकारी पक्षपनि पीडित ‘गौशाला २६’ नाबालिक रहेको भन्दै उच्च अदालत पुगेको छ ।
अदालतले आजका लागि पेशी तोकेको छ । अपिलकर्ताले उच्च अदालतसमक्ष तल्लो अदालतको आदेशमा गम्भिर त्रुटि भएको भन्दै अपिल गर्ने गर्छन् । त्यसपछि अदालतले मुद्दालाई पुनरावलोकन गर्ने कि नगर्ने निर्णय लिनेछ । सन्दीपका कानुन ब्यवसायि सरोज कृष्ण घिमिरेले दुबै पक्ष उच्च अदालतमा पुगेकाले स्वभाविक रुपमा मुद्दा पुनरावलोकन हुने विश्वास ब्यक्त गरे ।
Published Date: 05 April 2024
