काठमाडौँ, फागुन २९ । बैंकहरुमा अधिक तरलता हुँदा बैंकहरुले एक महिनामा नै ५ खर्ब बढी निक्षेप राष्ट्र बैंकमा राखेका छन्। बैंकहरुले बढी भएको तरलता राष्ट्र बैंकमा राखेका हुन्।
फागुनदेखि मात्रै केन्द्रीय बैंकले स्थायी निक्षेप सुविधा कार्यान्वयनमा ल्याएकाे थियो। फागुन २७ गतेसम्ममा बैंकहरुले ५ खर्ब ३१ अर्ब निक्षेप ३ प्रतिशत ब्याजमा नै राष्ट्र बैंंकमा राखेका हुन्। योमध्ये अझै पनि ६६ अर्ब रुपैयाँ निक्षेप राष्ट्र बैंकमा नै छ।
अधिक तरलता भएपछि बैंकहरुले एक महिनामा नै ८ पटक स्थायी निक्षेप सुविधा प्रयोग गरिसकेका छन्। खासगरी बैंकहरुले सातामा २ पटक स्थायी निक्षेप सुविधा प्रयोग गर्न पाउने राष्ट्र बैंकको व्यवस्था छ। सोहि अनुसार बैंकहरुले बढी भएको निक्षेप राष्ट्र बैंकमा राख्ने गरेका छन्।
पछिल्लो समय निक्षेप संकलन लगातार बढ्दो क्रममा छ। कर्जा लगानी न्युन हुँदा बैंकहरुमा लगानीयोग्य रकम थुप्रिरहेको छ। यसले गर्दा ब्याजदर समेत घट्दै गएको छ।
फागुनदेखि नेपाल राष्ट्र बैंकले स्थायी निक्षेप सुविधा उपलब्ध गराएको भएपनि अन्तरबैंक ब्याजदर ३ प्रतिशतभन्दा तल झरेको छ। राष्ट्र बैंकले बैंकहरुमा बढी भएको तरलता राष्ट्र बैंकमा निक्षेपको रुपमा राख्न मिल्ने गरी स्थायी निक्षेप सुविधा कार्यान्वयनमा ल्याएको थियो। तर पनि अहिले अन्तरबैंक ब्याजदर ३ प्रतिशतभन्दा तल नै छ।
राष्ट्र बैंकले ब्याजदर करिडोरलाई प्रभावकारी बनाउन उक्त सुविधा ल्याएको थियो। पछिल्लो धेरै महिनादेखि बैंकहरुको अन्तरबैंक ब्याजदर केन्द्रीय बैंकले राखेको लक्ष्यको तल्लो सिमाभन्दा तल थियो।
अहिले बैंक तथा वित्तीय संस्थामा लगानीयोग्य रकम अधिक छ। बैंकहरुको सिडि रेशियो ७९.९० प्रतिशतमा झरेको छ। यसले बैंकहरुसँग ६ खर्बभन्दा धेरै लगानीयोग्य रकम रहेको देखाउछ। तर पनि पछिल्लो समय कर्जा लगानी न्युन नै रहेको छ।
