काठमाडौँ, फागुन १७ । काठमाडौंको बानेश्वरस्थित संसद भवन परिसर छिरेपछि पक्राउ परेका लघुवित्त ऋणीहरूलाई प्रहरीले छाडेको छ । मंगलबार पक्राउ परेका ४९ जनालाई हाजिरी जमानीमा छाडेको हो ।
तीन दिनअघि संसद बैठक चलिरहेका बेला लघुवित्तले आफूहरूलाई पीडित बनाएको दाबी गर्ने समूह प्रहरीलाई ठेल्दै भवनभित्रै प्रवेश गर्न खोजेको थियो । केही समययतादेखि लघुवित्त पीडितहरु काठमाडौं केन्द्रित आन्दोलनमा रहेका छन् । लघुवित्त पीडित संघर्षका नाममा उनीहरुले न्यायको माग गर्दै आन्दोलन जारी राखेका छन् ।
लघुवित्तका ऋणीहरुसँग सरकारले तेस्रो पटकसम्म वार्ता गरे पनि निष्कर्ष निस्कन सकेको छैन । सुरक्षामा लापरवाही गरेको भन्दै संसद भवन सुरक्षार्थ खटाइएको प्रहरी युनिट परिवर्तन गरिएको थियो ।
Published Date: 29 February 2024
