काठमाडौं, फागुन १६ । घरेलु मैदानमा जारी त्रिकोणात्मक टी-२० सिरिजअन्तर्गत दोस्रो खेलमा नेपालले नेदरल्यान्ड्सविरुद्ध पहिला फिल्डिङ गर्ने भएको छ ।
टियु क्रिकेट मैदानमा नेपालका कप्तान रोहित पौडेलले टस जितेर पहिला फिल्डिङ गर्ने निर्णय लिएका हुन् । नेपालले त्रिकोणात्मक टी-२०आई सिरिज अन्तर्गत नेदरल्यान्ड्ससँगको खेलका लागि टोलीमा दुई परिवर्तन गरेको छ।
ललित राजवंशी र प्रजिश जिसी नेपालको प्लेइङ ११ मा छन्। अभिनाश बोहरा र विवेक यादव बेञ्चमा छन्। नामिबियासँग ४ ओभरमा ४९ रन खर्चेर १ विकेट लिएका अभिनाशलाई बाहिर राखेको छ ।
अभिनाशलाई बाहिर राख्दा बायाँ हाते तीव्र गतिका बलर प्रतिश जिसीलाई मौका दिएको छ। प्रतिशले आज डेथ ओभरमा बलिङ गर्नुपर्ने हुन्छ । तल्लोक्रममा राम्रो ब्याटिङको क्षमता समेत राख्छन् । ललित भने नेपालका प्रमुख स्पिनर हुन् । स्पिन बलिङ आक्रामण मजबुत बनाउन विवेकलाई बाहिर राखेर ललितलाई खेलाएको छ । पहिलो खेलमा नामिबियासँग २० रनले पराजित भएको नेपाललाई जित्नै पर्ने दबाब छ ।
नेपालको टोली : रोहित पौडेल, आसिफ शेख, सन्दीप जोरा, कुशल भुर्तेल, कुशल मल्ल, प्रतिश जिसी, दीपेन्द्र सिंह ऐरी, करण केसी, गुल्सन झा, ललित राजवंशी, सोमपाल कामी ।
Published Date: 28 February 2024
