काठमाडौं, फागुन १४ । वरिष्ठ गायक तथा भजन शिरोमणी भक्तराज आचार्य अब हामीमाझ रहेनन् । सोमवार साँझ ५ बजे ललितपुरको मेडिसिटी अस्पताल लैजाने क्रममा ८१ वर्षीय भजन शिरोमणी आचार्यको बाटोमै निधन भएको संगीतकार संघ नेपालका अध्यक्ष चेतन सापकोटाले जानकारी दिएका छन् ।
अहिले मेडिसिटी अस्पतालमै रहेका संगीतकार संघको पूर्व अध्यक्ष तथा संगीतकार लक्ष्मण शेषका अनुसार आचार्यको निधन सोमवार साँझ ५ बजे भएको हो । संगीतकार शेषका अनुसार संगीतकार संघका अध्यक्ष चेतन सापकोटोसंग छलफल गरेपछि मंगलवार बिहान अन्तिम श्रद्धाञ्जलीका कार्यक्रम घोषणा गरिने छ ।
भजन शिरोमणी आचार्यको शवलाई अन्तिम श्रद्धाञ्जलीका लागि मंगलवार बिहान नेपाल संगीत तथा नाट्य प्रतिष्ठानमा राखिने बताइएको छ ।
यस्तो छ भक्तराज आचार्यको जीवनी
वि.सं १९९९ असोज १६ मा धनकुटामा जन्मिएका भक्तराज आचार्य नेपाली सांगीतिक क्षेत्रका नक्षत्र थिए भन्दा फरक पर्दैन । यसैकारण उनलाई भजन शिरोमणिको उपनाम प्रदान गरिएको थियो ।
बुबा बलभद्र तथा आमा रेनुकाको कोखबाट विसं १९९९ साल असोज १६ मा जन्मिएका आचार्यले डेढ वर्षकै उमेरमा आफ्ना बुवा गुमाएका थिए ।
सोहि बेला गाउँमा चलेको महामारीका कारण आमासँगै उनी भारतको डुअर्सको चियाबगान पुगेका थिए, जहाँ उनले जीवनका ३१ वर्ष बिताए ।
आमाको अवस्था पनि कमजोर हुँदै गएपछि कम उमेरमै उनले पारिवारिक दायित्व सम्हाल्नु परेको थियो ।
पारिवारिक अवस्था जे जस्तो भए पनि उनले संगीतप्रतिको लगावलाई कम हुन दिएनन् । फलस्वरुप उनले ‘संगीत प्रभाकर’ सम्मको उनले अध्ययन गरे।
वि.सं.२०३० सालपछि भने उनको सांगीतिक जीवनले नयाँ गति लिएको थियो । २०३० सालमा काठमाडौंमा भएको अधिराज्यव्यापी राष्ट्रिय गीत प्रतियोगितामा उनले गाएको ‘होसियार यसबखत समयको मुखलाई चिन’ प्रथम हुँदै स्वर्ण पदक प्राप्त गरेका थिए । उक्त गीतका संगीतकार तथा रचनाकार अम्बर गुरुङले पनि स्वर्ण पदक प्राप्त गरेका थिए ।
उक्त प्रतियोगितामा प्रथम भएपछि आचार्य रेडियो नेपालका जागिरे भएका थिए । त्यसयता २०४६ साल सम्ममा उनले साढे चार सयभन्दा बढी गीत रेकर्ड गराइसकेका थिए ।
आचार्यका अधिकांश गीतहरुमा उनी आफैंले शब्द रचना गरेका छन् । आचार्यले भजनसहित आधुनिक, गजल, राष्ट्रिय, बालगीत लगायत विभिन्न शैलीका गीत गाएका छन् ।
विसं २०४६ सालको एक साँझ बौद्धमा सांघातिक हमला भएपछि भक्तराजका टाउकामा झन्डै सयभन्दा बढी टाँका मार्नु परेको थियो । त्यसयता लगभग उनको गायन यात्रामा विराम लाग्न पुग्यो ।
उनका दुई सुपुत्र सत्यराज आचार्य तथा स्वरूपराज आचार्य नेपाली सांगीतिक क्षेत्रका दुई नक्षत्रको रुपमा रहेका छन् ।
