काठमाडौँ, माघ २१ । वेस्ट इन्डिजलाई दोस्रो एकदिवसीय अन्तर्राष्ट्रिय खेलमा ८३ रनले हराउँदै अष्ट्रेलियाले एक खेल बाँकी रहँदै ३ खेलको ओडीआई सिरिज जितेको छ ।
पहिलो ओडीआईमा ८ विकेटको जित निकालेको अष्ट्रेलियाले सिड्नीमा आइतबार सन एबोटको अलराउन्ड प्रदर्शनमा जित दर्ता गरेको हो । ब्याटिङतर्फ ६३ बलमा ६९ रनको योगदन दिएका एबोटले बलिङतर्फ पनि ३ विकेट हात पारेका थिए ।
अष्ट्रेलियाले प्रस्तुत गरेको २ सय ५९ रनको लक्ष्य पछ्याउने क्रममा वेस्ट इन्डिजले १ सय ७५ रन जोड्दै सबै विकेट गुमाएको थियो । ४४ ओभरमै अलआउट भएको वेस्ट इन्डिजका लागि केसी कार्टिले सर्वाधिक ४० रनको योगदान दिएका थिए ।
टस हारेर ब्याटिङको निम्तो पाएको अष्ट्रेलिया एक समय ९१-५ को स्थितिमा थियो । तर तल्लोक्रममा एबोटसँगै म्याथ्यु सर्ट (४१), आरोन हार्डी (२६) र विल सदरल्याण्ड (१८) ले राम्रो ब्याटिङ गरे । शीर्षक्रमका क्यामरन ग्रीनले ३३ र मार्नस लाबूसेनले २६ रन बनाएका थिए ।
अब सिरिज क्लिनस्विपको निर्णयका लागि मंगलबार क्यानबेरामा तेस्रो खेल हुनेछ । यसअघि टेस्ट सिरिज भने १-१ को बराबरीमा सकिएको थियो ।–एजेन्सी
