काठमाडौँ, पुस २४ । लामो समयदेखि प्रहरीको खोजीमा रहेका तपश्वी रामबहादुर बमजन अन्नतः प्रहरीको फन्दामा परेका छन् । तपश्वीको भेषमा विभिन्न ठाउँमा आश्रम खोल्दै आएका रामबहादुर बमजनलाई पक्राउ गर्न प्रहरीको टोली उनी बसेको घरमा पुग्दा उनी भाग्न खोजे पनि प्रहरीले उनलाई समात्न सफल भएको छ ।
केन्द्रीय अनुसन्धान ब्युरो (सीआइबी) का डिएसपी धर्मराज भण्डारी नेतृत्वको टोली बमजनलाई पक्राउ गर्न खटिएको थियो । बमजन केही समयदेखि काठमाडौंमा बस्दै आएको भन्ने सूचना आफूहरुलाई प्राप्त भएको सीआइबी प्रमुख एवं एआइजी किरण बज्राचार्यले जानकारी दिएकी छन् । उक्त टोलीले अनुसन्धान र निगरानी गरी मंगलबार बुढानिलकण्ठको हात्तीगौडास्थित घरमा रहेको तथ्य पत्ता लगायो । त्यसपछि बुढानिलकण्ठस्थित रहेको एक घरमा डिएसपी भण्डारीको टोली पुग्यो ।
प्रहरीको टोली जब उनी बसेको घरमा पुग्यो बमजनले आफूलाई पक्राउ गर्न आएको सुइको पाइहाले । उनी उक्त घरमा आफ्नी श्रीमती र छोराछोरीसँग बस्दै आएका थिए । उनकी श्रीमतीलगायतले पनि प्रहरीलाई रोक्न कोशिस गरे । बमजन घरको दोस्रो तलामाथि थिए । प्रहरी आएको मेसो पाएपछि बमजनले बरण्डाबाट हामफालेको सीआइबी स्रोतले जानकारी दिएको छ । उनी भाग्न लागेपछि प्रहरीले उनलाई बाहिरै पक्राउ गरेको स्रोतले बताएको छ ।
लगातार १८ दिनदेखि पछि लागेर सीआईबीको टोलीले उनलाई काठमाडौंको हात्तीगौंडास्थित घरबाटै पक्राउ गर्न सफल भएको हो। बमजन पक्राउ परेको पुष्टि सीआईबीका प्रवक्ता एसपी नवराज अधिकारीले गरे । बमजन काठमाडौं आसपासमै रहेको सूचनापछि सीआईबीको टोली १८ दिनदेखि उनको पछि लागेको थियो ।
उनीविरूद्ध पाँच परिवारले उजुरी दिएका थिए । आफ्नो आश्रममा बस्दै आएका तीन जना युवती र दुई युवालाई बेपत्ता पारेको उजुरी विभिन्न प्रहरी कार्यालयमा दर्ता भएको थियो । तीमध्ये एक जनालाई उनले सिन्धुपाल्चोकस्थित आश्रममा हत्या गरी शवसम्म बेपत्ता पारेको आरोप छ । उनीविरूद्ध गंगामायाले बलात्कारको जाहेरी दिएकी थिइन् । सर्लाही जिल्ला अदालतमा उक्त मुद्दा विचाराधीन छ । उनीमाथि आश्रममा बस्ने युवती र युवकहरू बेपत्ता पारेको भन्दै उजुरी परेका थिए । तर उनी लामो समयदेखि फरार थिए । प्रहरीको टोली पटक पटक उनको आश्रममा पुगेको थियो छ । तर प्रहरीले उनलाई पत्ता लगाउन सकेको थिएन ।
