काठमाडौं, पुस २४ । प्रहरीले माइतीघरबाट वरिष्ठ अर्थोपेडिक सर्जन तथा चिकित्सा शिक्षा सुधारका अभियन्ता डा गोविन्द केसीसहित केहीलाई पक्राउ गरेको छ ।
डा गोविन्द केसी र अर्का कार्यकर्ता पवन थापालाई प्रहरीले मंगलबार दिउँसो माइतीघर मण्डलाबाट पक्राउ गरेको हो । उनीहरुलाई अहिले सिंहदरबार प्रहरी कार्यालयमा राखिएको छ ।
चिकित्सा शिक्षा सुधार र पहुँचको माग गर्दै लामो समयदेखि आमरण अनशनरत डा केसीलाई निषेधित क्षेत्रमा धर्ना दिएपछि प्रहरीले पक्राउ गरेको हो । ‘हामीले शान्तिपूर्ण आन्दोलन गरेका थियौं, तर प्रहरीले पक्राउ गरेर सिंहदरबार प्रहरी वृत्तमा ल्यायो’, थापाले भने ।
डा केसी र थापाले माइतीघरलाई निषेधित क्षेत्र नबनाउन र नागरिकले गुनासो पोख्न पाउनुपर्ने माग गर्दै आन्दोलन गरेका थिए । काठमाडौंको स्थानीय प्रशासनले माइतीघर क्षेत्रलाई कुनै पनि प्रकारका आन्दोलनका लागि निषेधित क्षेत्र घोषणा गरेको छ ।
Published Date: 09 January 2024
