रिवेनी (रुकुम पश्चिम), पुस २२ । रुकुमपश्चिममा भूकम्पपीडितका लागि अस्थायी घर निर्माणको काम भइरहेको छ ।
२०२३ नोभेम्बर ३ मा जाजरकोटको रामिडाँडा केन्द्रबिन्दु भएर जाजरकोट र रुकुमपश्चिम जिल्लामा गएको भूकम्पले हजारौं घर ध्वस्त बनाएको थियो ।
भूकम्प गएको दुई महिना बितिसक्दा पनि अधिकांश भूकम्पपीडित अझै पनि तारपालीमुनि बाँचिरहेका छन् । जिल्लामा दुई महिनामा १० हजार ४२३ अस्थायी घर बने पनि त्यस्ता सुविधा पाउनेको सङ्ख्या ठूलो रहेको निमित्त प्रमुख जिल्ला अधिकारी प्रवेश बडुवालले बताए ।
उनले जिल्लामा सात हजार ८७ घर निर्माणाधीन रहेको जानकारी दिए । हालसम्म सबैभन्दा बढी सानीभेरी गाउँपालिकामा चार हजार ४१ अस्थायी झोपडी बनेका छन् भने मुसिकोट नगरपालिकामा २४ वटा मात्रै झोपडी छन् ।
आठबिसकोट नगरपालिकामा ३ हजार १४, चौरजहारी नगरपालिकामा २ हजार २ सय ८९, त्रिवेणी गाउँपालिकामा ९ सय ३८ र बाफिकोट गाउँपालिकामा १ सय १७ वटा अस्थायी झुपडी निर्माण भएको बडुवालले बताए ।
जिल्ला विपद् व्यवस्थापन कोषबाट हालसम्म २३ हजार ६०८ लाभग्राहीका लागि स्थानीय दैवी प्रकोप उद्धार कोषमा जम्मा रु ५९ करोड २० लाख पठाइएको छ ।
त्यस्तै, प्रहरीले जिल्लाभर २७ हजार ६८२ लाभग्राहीको विवरण सङ्कलन गरेको छ । जिल्ला प्रशासन कार्यालय रुकुम पश्चिमले विवरण सङ्कलन गर्ने कार्य जारी रहेकाले लाभग्राहीको सङ्ख्या बढ्न सक्ने अनुमान गरेको छ ।
Published Date: 07 January 2024
