काठमाडौं, मंसिर २८ । प्रधानमन्त्री पुष्पकमल दाहाल ‘प्रचण्ड’ को आह्वानमा चौमासिक समीक्षा बैठक बस्ने भएको छ । आज (बिहीबार) दिउँसो साढे १२ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा बस्ने गरी प्रधानमन्त्री प्रचण्डले समीक्षा बैठक बोलाएका हुन् ।
बैठकमा सबै मन्त्री र सबै मन्त्रालयका सचिवलाई आमन्त्रण गरिएको प्रधानमन्त्री प्रचण्डको सचिवालयले जनाएको छ । चालु आर्थिक वर्षको साउन, भदौ, असोज र कात्तिक महिनाको समीक्षाको लागि प्रधानमन्त्रीले बैठक बोलाएका हुन् ।
समीक्षा बैठक लगत्तै प्रधानमन्त्री प्रचण्डले आजै दिउँसो ३ बजे मन्त्रीपरिषद् बैठक पनि बोलाएका छन् । आजको मन्त्रिपरिषद् बैठकले परराष्ट्र सचिवमा सेवा लम्साललाई नियुक्ति गर्ने सम्भावना छ ।
