काठमाडौँ, मंसिर २७ । अर्थमन्त्री डा. प्रकाशशरण महतले मौद्रिक नीतिको प्रथम त्रैमासिक समीक्षापछि शेयर बजारमा देखिएकाे दुविधा हटेको बताएका छन् । पछिल्लो केही दिनदेखि बढ्दै गएको शेयर बजारको बढाइले त्यो दुविधा हटेको प्रष्ट भएको अर्थ मन्त्रालयमा आज आयोजित पत्रकार सम्मेलनमा उनले बताएका हुन्।
अर्थ मन्त्रालय र राष्ट्रबैंक बीच निरन्तरको छलफल र समन्वयबाट मौद्रिक नीतिलाई थप खुकुलो बनाउँदै लगिएको बताउँदै उनले समीक्षाबाट मौद्रिक नीतिमा महत्वपूर्ण परिवर्तन भएको बताए ।
मौद्रिक नीतिको समीक्षामा हालै गरिएको परिवर्तनले बैंक तथा वित्तीय संस्थामा सकारात्मक प्रभावले क्रमशः आर्थिक क्रियाकलाप बढ्दै गएको बताए । ‘घरजग्गा र शेयर कारोबार बढ्न शुरु गरेको छ । चैत्रमसान्तसम्म समस्यामा परेका ऋणीहरुलाई कर्जाको पुनरसंरचना गर्ने अवधि दिइएको छ । घट्दो व्याजदरले विविध कारणले बैंकको ऋण तिर्न नसकेको व्यसायीलाई राहत दिनेछ ।’–अर्थमन्त्री महतले पत्रकार सम्मेलनमा भने । अर्थ मन्त्रालयले निर्माण व्यवसायीलाई भुक्तानी दिन बाँकी रहेको अधिकांश दायित्व व्यवस्थापन गरिसकेको दाबी गरे ।
रेमिट्यान्स हालसम्मकै उच्च रुपमा भित्रिरहेको बताउँदै अर्थमन्त्री महतले अब अर्थतन्त्र चलायमान बनाउने गरी पुँजीगत खर्च बढाउन प्राथमिकता दिइएको बताए । अन्तर्राष्ट्रिय निकायबाट जुनसुकै परियोजनामा अनावश्यक ऋण लिने प्रवृत्तिको सट्टा आवश्यकता र औचित्यको आधारमा मात्र ऋण परिचालन गरिएको बताए । कर प्रणालीमा सुधारका लागि उच्च स्तरीय समिति गठन गरेर नयाँ कराधार विस्तार र राजस्व चुहावट नियन्त्रणमा चालेको ठोस कदमस्वरुप राजस्वमा सुधार हुँदै गएको अर्थमत्री महतले जानकारी दिए ।
अर्थमन्त्री महतले पुँजीगत खर्चको वृद्धि दर ६ प्रतिशत रहेको जानकारी दिँदै उनले भन्सार महसुल १३ प्रतिशत, मूल्य अभिवृद्धि कर ७ दशमलब १९ प्रतिशत र आयकर १२ प्रतिशत तथा समग्र कर राजस्व ७ दशमलब ५७ प्रतिशतले वृद्धि भएको बताए ।
हाल अर्थतन्त्रलाई देखिएको सकारात्मक अवस्थालाई उपभोग र लगानीमा प्रतिविम्वित गराउने, खर्चमा मितव्ययीता अपनाएर सरकारी लगानीमा विद्यमान अवरोधहरु फुकाउने, पश्चिम क्षेत्रमा आएको भूकम्पबाट प्रभावितहरुलाई तत्काल राहत र ध्वस्त संरचनाको छिटो पुरनसंसचना गर्ने र युवाहरुलाई स्वदेशमै रोजगारीमा अवसरी दिएर आर्थिक वृद्धि हासिल गरिने बताए ।
