काठमाडौँ, मंसिर २१ । नेपाल सुपर लिग एनएसएलमा बिहीबार चितवनले बुटवल लुम्बिनीसँग बराबरी खेलेको छ । प्राप्त अग्रतालाई जोगाउन नसक्दा चितवनले बुटवलसँग बराबरी खेल्दै अंक बाँडेको हो ।
खेलको इन्जुरी समयको पहिलो मिनेटमा स्टेफन समिर बियोङले गोल गर्दै बुटवललाई एक अंक दिलाउन सफल रहे ।
मणी लामाले निकालेको पासमा चितवनका डिफेन्डरको बीचबाट बियोङले चलाखीपूर्ण गोल गर्न सफल रहे । जुन गोलमा चितवनका डिफेन्डर र गोलकिपरको समन्वयको अभावले समेत सहयोग गर्यो ।
पहिलो हाफ बराबरीमा सकिएको खेलमा अग्रता भने चितवनले उत्सव राईको गोलमा लिएको थियो ।
दोस्रो हाफ सुरु भएको तेस्रो मिनेटमा उत्सवले लामो दुरीबाट प्रहार गरेको बल पोस्ट भित्र छिरेको थियो । बुटवलका गोलकिपर मोहमदुको कमजोर किपिङमा उत्सवको प्रहारले जाली चुमेको थियो ।
खेलको अन्तिम समयमा बियोङले गोल गर्दै बुटवललाई महत्वपुर्ण एक अंक दिलाउन सफल रहे । बुटवलले चार खेलबाट ४ अंक जोडेको छ । चितवनले चार खेलबाट ५ अंक जोडेको छ ।
Published Date: 07 December 2023
