लन्डन, कार्तिक १९ । एन्थोनी गोर्डनले दोस्रो हाफमा गरेको विवादास्पद गोलको मदतले न्युकासल युनाइटेडले शनिबार इंग्लिस प्रिमियर लिगमा आर्सनललाई १–० ले हराएको छ । यसँगै लिगमा आर्सनलको अपराजित यात्रा समाप्त भएको छ । सेन्ट जेम्स पार्कमा भएको खेलमा गोर्डनले ६४ औं मिनेटमा गोल गरे ।
‘भार’ को मदतले त्यस गोलले मान्यता पाएको थियो । यो जितपछि न्युकासलको २० अंक भएको छ र छैटौं स्थानमा रह्यो । आर्सनल भने २४ अंकमा तेस्रो स्थानमा रह्यो । डिफेन्डिङ च्याम्पियन म्यानचेस्टर सिटी २७ अंकमा शीर्ष स्थानमा छ । उसले अर्को खेलमा बर्नमाउथलाई सजिलै ६–१ ले हरायो ।
यस्तै अन्य खेलमा म्यानचेस्टर युनाइटेडले फुलहमलाई १–०, ब्रेन्टफोर्डले वेस्ट ह्यामलाई ३–२, क्रिस्टल प्यालेसले बर्नलीलाई २–० र सेफिल्ड युनाइटेडले उल्भ्सलाई २–१ ले हरायो । एभरटन र ब्राइटनले १–१ को बराबरी खेले ।
Published Date: 05 November 2023
