काठमाडौँ, असोज १७ । आज रातीबाट सन् २०२५ अमेरिकी डाइभर्सिटी भिसा (डीभी) कार्यक्रमको लागि आवेदन दर्ता खुल्ने भएकाे छ । अमेरिकी दूतावासले सूचना जारी गर्दै बुधबार राति ९ः४५ बजेबाट डीभीको लागि आवेदन दिन सकिने बताएकाे हाे ।
आज रातीबाट आगामी नाेभेम्बर ७ वा कात्तिक २१ गते राति १० बजेर ४५ मिनेटसम्म डीभीको लागि आवेदन दिन सकिनेछ । डीभीकाे आवेदन निःशुल्क भर्न सकिने दूतावासले जनाएकाे छ ।
डीभी आवेदन भर्दा फाेटाे पछिल्लाे ६ महिनाभित्रकाे हुनुपर्ने र अघिल्लो वर्षको प्रयोग गरिएको फोटो यस वर्षको आवेदनमा प्रयोग नगर्न पनि दुतावासले बताएकाे छ । फोटो खिच्दा आवेदकहरूले चश्मा लगाउनु नहुने समेत दूतावासले बताएको छ ।
डीभीकोलागि अनलाइन फारम भर्नुपर्ने हुन्छ । आवेदनमा आवेदकको पति–पत्नी र २१ वर्षभन्दा कम उमेरका सबै अविवाहित सन्तानकाे समेत जानकारी दिनु अनिवार्य रहेको छ ।
दुतावासका अनुसार डिभी कार्यक्रमका लागि हुने छनौट योग्य आवेदकहरू मध्येबाट एकदमै निष्पक्ष रूपमा गरिनेछ। डिभी आवेदन प्रति व्यक्ति एउटा मात्र आवेदन बुझाउन र एकभन्दा बढी आवेदन बुझाउने आवेदकहरू कार्यक्रमका लागि अयोग्य ठहरिने पनि दुतावासले जनाएकाे छ ।
याे सिजनमा छानिएका व्यक्तिहरूले २०२५काे सेप्टेम्बर ३० सम्ममा आफ्नाे आप्रवासी भिसाकाेलागि आवेदन दिने र प्राप्त गर्नुपर्ने पनि दुतावासले जनाएकाे छ । डिभी २०२५काे छनाेट २०२४काे मे महिनामा गरिने भएकाे छ ।
Published Date: 04 October 2023
