काठमाडौं, भदौ ५ । मलेसियामा आजदेखि चार राष्ट्रको सहभागिता रहेको महिला टी–२० क्रिकेट सिरिजमा नेपालले आज हङकङसँग खेल्दैछ । नेपाल र हङकङबीचको खेल बाय्युमास ओभलमा हुनेछ । खेल स्थानीय समय अनुसार दिउँसो २ बजे सुरु हुनेछ ।
त्यसअघि आयोजक राष्ट्र मलेसियाले प्रारम्भिक खेलमा कुवेतसँग प्रतिस्पर्धा गर्दै सिरिजको सुरुवात गर्नेछ ।
यो चार राष्ट्रको टी–२० शृंखलाले आईसीसी महिला टी–२० विश्वकपको आगामी एशिया छनोटको तयारीको रूपमा महत्त्वपूर्ण महत्व राख्छ। छनोट प्रतियोगिता अगस्ट ३१ बाट मलेसियामा आयोजना हुँदैछ ।
नेपालले सन् २०१९ यता हङकङलाई हराउन सकेको छैन, त्यसैले नेपालले यस सिरिजमा हङकङलाई जित्ने रणनीतिक योजना बनाएको छ ।
गत जुनमा भएको इमर्जिङ कपमा नेपाल र हङकङको खेल प्रतिकूल मौसमका कारण रद्द भएको थियो ।
सन् २०१९ मा भएको टी–२० विश्वकप एसिया छनोटमा नेपालले हङकङलाई ४ विकेटले हराउन सफल भएको थियो तर २०२१ मा भएको टी–२० विश्वकप एशिया छनोट र गत वर्ष भएको एसीसी महिला टी–२० च्याम्पियनसिपमा नेपाल हङकङसँग पराजित भएको थियो ।
Published Date: 22 August 2023
