काठमाडौं, साउन २५ । पाकिस्तानको संसद भंग भएको छ । प्रधानमन्त्री शहवाज शरिफ नेतृत्वको मन्त्रीपरिषद्को सिफारिसमा राष्ट्रपति आरिफ अल्वीले बुधबार राति संसद भंग गरेको बीबीसीले जनाएको छ ।
बीबीसीका अनुसार संसदको कार्यकाल सकिन ३ दिन मात्रै बाँकी रहँदा प्रधानमन्त्री शरीफले संसद विघटनको सिफारिस गरेका हुन् ।कार्यकाल सकिनुअघि नै संसद विघटन भएपछि पाकिस्तानमा अब ९० दिनभित्र चुनाव गर्नुपर्नेछ ।
संसदको कार्यकाल सकिएको अवस्थामा भने ६० दिनभित्र चुनाव गर्नुपर्ने पाकिस्तानको संविधानमा उल्लेख छ ।तत्कालीन प्रधानमन्त्री इमरान खानले संसदबाट विश्वासको मत नपाएपछि गत वर्षको अप्रिलमा शहवाज प्रधानमन्त्री बनेका थिए ।
आइतबार मात्रै पूर्वप्रधानमन्त्री खान ३ वर्षका लागि जेल चलान भएका छन् । त्यहाँको निर्वाचन आयोगले उनलाई पाँच वर्षका लागि चुनाव लड्न प्रतिबन्धसमेत गरेको छ ।
Published Date: 10 August 2023
