काठमाडौं, असार १४ । अमरिकी प्रविधि कम्पनी ‘एप्पल’ को सेयर मूल्य बुधबार हालसम्मकै उच्च विन्दुमा पुगेको छ ।
आइफोन निर्माता कम्पनीको मूल्य बुधबार ०.६% ले बढेर १८९.२५ डलरको रेकर्ड विन्दुमा बन्द भएको हो । एप्पलको सेयर मूल्य लगातार दोस्रो दिन रेकर्ड विन्दुमा बन्द भएको हो । यससँगै, कम्पनीको सेयर बजार पुँजीकरण पनि ३० खर्ब डलर नजिक पुगेको छ ।
रोयटर्सका अनुसार एप्पलको बजार पुँजीकरण बुधबार २९ खर्ब ८० अर्ब डलर भन्दा बढी कायम भएको छ । यसअघि सन् २०२२ को जनवरी ३ मा एप्पलको सेयर बजार पुँजीकरणले इन्ट्रा डे कारोबारमा ३० खर्ब डलर छोएको थियो ।
यद्दपि, हालसम्म ३० खर्ब डलर भन्दा माथिको बजार पुँजीकरणमा कारोबार बन्द भने हुनसकेको छैन ।एप्पल विश्वको सबैभन्दा मूल्यवान कम्पनी हो । पछिल्लो समय वाल स्ट्रीटका अन्य प्रविधि कम्पनीहरुसँगै एप्पलको सेयर भाउमा पनि वृद्धि भइरहेको छ ।
विशेषगरी, फेडरल रिजर्भ ब्याजदर वृद्धि अभियानको अन्त्य नजिकै रहेको अनुमान र आर्टिफिसियल इन्टेलिजेन्स (एआई) को सम्भावनामा लगानीकर्ता आशावादी रहँदा सेयर भाउमा उछाल आएको छ । सन् २०२३ को हालसम्म एप्पलको सेयर भाउ ४६% ले बढिसकेको छ ।