भक्तपुर, असार १४ । मध्यपुर थिमि नगरपालिकाले वृत्ति मार्ग निर्देशन तथा रोजगार मेला आयोजना गर्ने भएको छ । विद्यार्थी र बेरोजगार युवा लाभान्वित हुने गरी यहि असार १६ गते शनिवार मेला आयोजना गर्न लागेको हो।
बुधवार नगरपालिकाद्वारा आयोजित पत्रकार सम्मेलनमा नगर प्रमुख सुरेन्द्र श्रेष्ठले विद्यार्थी र युवा वर्गलाई लक्षित गरी मेला आयोजना गर्न लागिएको बताए । उक्त मेला सानोठिमीस्थित आदर्श माविको प्रांगणमा शनिवार बिहान ९ बजे देखि साँझ ५ बजेसम्म चल्ने बताइएको छ ।
उक्त अवसरमा एकै थलोमा विद्यार्थी र वृत्ति बिकासका विज्ञहरुबीच मन्थन हुने र विद्यार्थीहरुले प्राप्त गर्ने सही सुझाव, सल्लाह र अवसरले वृत्ति विकासमा सहयोग पुग्ने नगर प्रमुख श्रेष्ठले बिश्वास व्यक्त गरे ।
नगरपालिकाका उपप्रमुख विजय कृष्ण श्रेष्ठले शिक्षा, स्वास्थ्य र रोजगारीलाई केन्द्रमा राखी नगरपालिकाले कामहरु गरिरहेको जिकिर गर्दै वृत्ति मार्गनिर्देशन र रोजगार मेला त्यसैको एक कडी भएको बताए ।
मेलामा रोजगारी प्रदान गरिनुका साथै साथै वृत्ति परामर्श सेवा, विभिन्न तालिम प्रदायक संस्थाको सिपमूलक, व्यवसायिक र स्वरोजगारमूलक तालिमबारे जानकारी र अवसर दिईने मेला व्यवस्थापन समितिका संयोजक एवं नगर प्रवक्ता कृष्ण हरि आचार्यले जानकारी गराए ।
