काठमाडौं, असार १३ । चीनको पाँच दिने भ्रमणमा रहेका उपप्रधानमन्त्री तथा गृहमन्त्री नारायणकाजी श्रेष्ठ चीनको सिचुवान प्रान्तको राजधानी छेन्दु पुगेका छन् ।
उनलाई आज चेङ्दु टियान्फु अन्तर्राष्ट्रिय विमानस्थलमा सिचुवान पिपुल्स गभर्नमेन्टका उपमहासचिव देङ सियाओगाङ र नेपालका महावाणिज्य दूतावास दिनेशकुमार घिमिरेले स्वागत गरेका थिए ।
उपप्रधानमन्त्री श्रेष्ठले बिहीबार वेस्ट चाइना इन्टरनेशनल फेयर (डब्लुसीआईएफ) को उद्घाटन सत्रलाई विशेष अतिथिका रुपमा सम्बोधन गर्ने कार्यक्रम छ भने दिउँसो छेन्दु र सिचुवान सहरको प्लानिङ एक्जिबिशन हलमा गएर प्रदर्शनी अवलोकन गर्ने कार्यक्रम छ ।
शुक्रबार उनले सिचुवान विश्वविद्यालयका नेतृत्वसँग भेटघाट गर्ने र त्यहाँ अध्ययनरत विद्यार्थीहरूलाई सम्बोधन गर्ने कार्यक्रम छ । उपप्रधानमन्त्री श्रेष्ठले शनिबार यिन्डियु भूकम्प, जिङपुस्थित ‘हाइड्रो जंक्शन’ र दुजियाङयानमा सिँचाइ प्रणाली र ग्रामीण पुनरुत्थान आयोजनाको भ्रमण गर्नेछन् ।
उनी सात सदस्यीय नेपाली प्रतिनिधिमण्डलको नेतृत्व गर्दै मंगलबार चीन प्रस्थान गरेका हुन् ।
