काठमाडौं, असार ६ । साफ च्याम्पियनसिप २०२३ अन्तर्गत पहिलो खेलमा नेपालले आज कुवेतको सामना गर्दैछ । खेल भारतको बेंगलोरस्थित कन्तिराभा रंगशालामा नेपाली समयअनुसार दिउँसो ३:४५ बजे सुरु हुनेछ ।
नेपाल गत विहीबार फिलिपिन्ससँग मैत्रीपूर्ण खेल खेलेर चार दिनअघि भारत आइपुगेको हो । फिलिपिन्ससँग १-० को हार बेहोरेपनि नेपाली टोलीको प्रदर्शन सन्तोषजनक रहेको थियो । यता कुवेतले पनि साफका लागि राम्रो तयारी गरेको छ । दुई अनौपचारिक मैत्रीपूर्ण खेलमा अफ्रिकी टोलीलाई हराएको कुवेत नेपालविरुद्ध आफ्नो वर्चस्व कायम गर्न चाहन्छ ।
कुवेतले अहिलेसम्म नेपालविरुद्ध हार बेहोरेको छैन । सन् २०१९ मा भएको मैत्रीपूर्ण खेलमा गोलरहित बराबरीमा रोक्नु नै कुवेतविरुद्ध नेपालको सबैभन्दा ठूलो उपलब्धि हो । नेपाल पछिल्लो भेटमा भने कुवेतसँग ४-१ ले पराजित भएको थियो ।
त्यसयता नेपाली टोलीमा धेरै परिवर्तन आएको छ । प्रशिक्षक अनेसेले पनि कुवेतसँग सतर्कताका साथ खेल्ने अनुमान लगाउन सकिन्छ । आजको खेलमा अंक हासिल गर्न सके नेपालले राम्रो सुरुवात गरेको मान्न सकिन्छ ।
Published Date: 21 June 2023
