काठमाडौं, वैशाख २८ । पूर्वराजा ज्ञानेन्द्र वीरविक्रम शाह अहिले परिवारसहित भारत भ्रमणमा छन् । भारतीय राज्य उत्तर प्रदेशका मुख्यमन्त्री योगी आदित्यनाथको निमन्त्रणामा पूर्वराजपरिवार भारत गएको बुझिएको छ ।
स्रोतका अनुसार आदित्यनाथले पूर्वराजा शाह र राजपरिवारलाई सम्राटका रूपमा ‘राज्य भ्रमण’को निम्तो दिएका थिए । सोही अनुसार पूर्वराजा, पूर्वरानी कोमल, पूर्व राजकुमारी हिमानी, पूर्वरानी आमा रत्न राज्यलक्ष्मी शाह र पूर्व राजकुमारी प्रेरणा वैशाख २२ गते भारत गएका थिए भने पूर्व राजकुमार पारस भने भ्रमण टोलीमा थिएनन् ।
पूर्वराजाका स्वकीय सचिव फणिराज पाठकले उत्तर प्रदेशका मुख्यमन्त्री आदित्यनाथले बुधबार दिउँसो पूर्व शाही परिवारसँग भेट गरेको बताए । उत्तर प्रदेशको राजधानी लखनउमा भेटघाट सौहार्दपूर्ण वातावरणमा भएको उनले बताए । तर, पाठकले कुराकानीमा के भयो भन्नेबारे अनभिज्ञता व्यक्त गरे ।
यो भ्रमण राजनीतिक भएको पूर्व शाही संस्था स्रोतले जनाएको छ । नेपालमा राजतन्त्रको पुनस्र्थापनाका लागि राजतन्त्रवादी शक्तिहरू जुटिरहेका बेला पूर्वराजा आफैँ पनि अन्तर्राष्ट्रिय समर्थन जुटाउने प्रयासमा छन् । दुई महिनामा पूर्वराजाको यो दोस्रो भारत भ्रमण हो । यसअघि उनले गत फेब्रुअरीमा श्रीमतीसँग भारत भ्रमण गरेका थिए ।
पूर्व शाही परिवार भारतमा कति दिन बस्ने भन्ने बारे कुनै जानकारी दिइएको छैन। पूर्वराजा जेठ ६ गते धनगढीमा आयोजना हुने नागरिक अभिनन्दनमा सहभागी हुनेछन् ।
