काठमाडौँ, वैशाख १३ । विलियम ओपोकु र दीपक राज सिंह ठकुरी चम्कँदा सातदोबाटो युथ क्लबले सहिद स्मारक ‘ए’ डिभिजन लिगमा सानदार जित दर्ता गरेको छ ।
सातदोबाटोले संकटा क्लबमाथि ४–० को सानदार जित दर्ता गरेको हो । सातदोबाटोको जितमा विलियम र दीपकले समान दुई गोल गरे । सातदोबाटोले पहिलो र दोस्रो हाफमा समान दुई गोल गर्न सफल भएका थिए ।
च्यासल रंगशालामा बुधबार भएको खेलको १०औं मिनेटमा विलियमको गोलबाट सातदोबाटोले १–० को अग्रता लिन सफल भयो । १९औं मिनेटमा विलियमले व्यक्तिगत र टोलीका लागि दोस्रो गोल गर्दै सातदोबाटोलाई पहिलो हाफमा २–० ले अघि बढाए ।
दोस्रो हाफको दुवै गोल दीपकको नाममा रह्यो । ६८औं मिनेटमा दीपकले गोल गर्दै सातदोबाटोलाई ३–० को अग्रता दिलाए । ८२औं मिनेटमा दीपकले व्यक्तिगत दोस्रो र टोलीका लागि चौथो गोल गर्दै सातदोबाटोलाई सानदार जित दिलाए ।
यस जितसँगै सातदोबाटो १२ खेलबाट २१ अंक जोडेर तेस्रो स्थानमा उक्लिएको छ । पराजित संकटा १५ अंक जोडेर नवौं स्थानमा छ ।
Published Date: 26 April 2023
