काठमाडौं,चैत १८ । दक्षिण अफ्रिकाले आइसिसी सुपर लिगमा नेदरल्यान्ड्समाथि दोस्रो ओडिआई खेलमा ८ विकेटको सहज जितका साथ विश्वकप नजिक पुगेको छ । महत्वपूर्ण १० अंक जोड्दै दक्षिण अफ्रिका आगमी अक्टोबर नोभेम्बरमा भारतमा हुने विश्वकपमा स्थान बलियो बनाएको छ ।
जितको लागि १ सय ९० रनको विजयी लक्ष्य पछ्याएको दक्षिण अफ्रिकाले ३० ओभरमा २ विकेट गुमाउँदै पूरा गर्यो । दक्षिण अफ्रिका जितमा टेम्बा बभुमा ७९ बलमा ८ चौका र १ छक्कासहित ९० रनमा अविजित रहे । एडेन माक्ररम ३९ बलमा ७ चौका र १ छक्कासहित ५१ रनमा अविजित रहे ।
माक्ररम र बभुमाले तेस्रो विकेटका लागि १ सय २ रनको साझेदारी गरेका थिए । क्विन्टन डि कक ९ र रास्सी भान डर डुसेन ३१ रनमा आउट भए । नेदरल्यान्ड्सका फर्द क्लासेन र आर्यन दत्तले एक एक विकेट लिए ।
त्यसअघि बिनोनी पार्कमा टस हारेर पहिला ब्याटिङको निम्तो पाएको नेदरल्यान्ड्स ४६.१ ओभरमा १ सय ८९ रनमा अल आउट भयो । नेदरल्यान्ड्सका तेजा निडामानुरुले ७१ बलमा ३ छक्कासहित सर्वाधिक ४८ रन बनाए । ओपनर विक्रमजित सिंहले ५३ बलमा ४ चौका र ३ छक्कासहित ४५ रन बनाए । अन्य कुनैपनि खेलाडीले राम्रो प्रदर्शन गर्न सकेनन् ।
दक्षिण अफ्रिकाका सिसान्डा मगलाले ८ ओभरमा २ मेडनसहित ३७ रन खर्चेर ३ विकेट लिदै प्लेयर अफ द म्याच चुनिए । तबरेज शाम्सीले १० ओभरमा १ मेडनसहित २५ रन खर्चेर ३ विकेट लिए । एनरिच नोर्कियाले दुई, मार्को यानसन र एडेन माक्ररमले एक एक विकेट लिए ।
दक्षिण अफ्रिका २० खेलमा ८ मा जित र १० मा हारसहित ८८ अंकका साथ नवौं स्थानमा छ । अन्तिम खेलमा आइतबार नेदरल्यान्ड्सलाई हराउँदा ९८ अंक हुनेछ । वेस्टइन्डिज २४ खेलमा ९ मा जित र १५ मा हारसहित ८८ अंकका साथ आठौं स्थानमा छ ।
आयरल्यान्ड २१ खेलमा ६ मा जित र १३ मा हारसहित ६८ अंकका साथ ११ औं स्थानमा छ । दक्षिण अफ्रिका सोझै विश्वकपमा पुग्न अन्तिम खेलमा जित निकाल्नुपर्छ । साथै आयरल्यान्डले अर्को महिना घरेलु मैदानमा बंगलादेशसँग हुने तीन खेलको सिरिजमा एक खेल हार्नुपर्ने हुन्छ ।
आयरल्यान्ड सबै खेलमा विजयी हुँदा समान अंक हुँदा नेटरनरेटमा निर्भर रहनेछ । श्रीलंका, जिम्बावे र नेदरल्यान्ड्सले भने आगमी जुन जुलाईमा हुने विश्वकप छनोट खेल्ने पक्का भएको छ । आयरल्यान्ड र वेस्टइन्डिजको पनि उच्च सम्भावना छ ।
विश्वकप छनोटमा नेपाल, स्कटल्यान्ड र ओमान लिग २ बाट शीर्ष तीनमा रहँदै पुगेका छन् । प्लेअफ क्वालिफायरबाट दुई टोली आउनेछन् । विश्वकप छनोटमा १० टोली हुनेछन् । दुई समूह हुँदै सुपर सिक्सबाट शीर्ष दुईमा रहने टोली विश्वकप खेल्न पाउनेछ । – एजेन्सी
