काठमाडौं, चैत १२ । नेपाल राष्ट्र बैंकले चाँदी आयातको मात्रा बढाएको छ । विदेशी मुद्रा सञ्चिति बढेसँगै केन्द्रीय बैंकले बैंक तथा वित्तीय संस्थालाई एकैपटक ६० हजार डलर बराबरको चाँदी आयात गर्न अनुमति दिएको हो ।
यसअघि विदेशी मुद्रा सञ्चिति घटेपछि राष्ट्र बैंकले ३५ हजार डलरको चाँदी आयातको सीमा तोकेको थियो । तर अब बैंक तथा वित्तीय संस्थाले एक पटकमा ८० किलो चाँदी आयात गर्न पाउने भएका छन् ।
राष्ट्र बैंकको विदेशी विनिमय व्यवस्थापन विभागले जारी गरेको एकीकृत निर्देशनलाई परिमार्जन गर्दै यो सीमा बढाइएको हो ।
नेपाल सुनचाँदी व्यवसायी महासंघका अनुसार नयाँ प्रणालीमा चाँदीको आयात तथा बिक्री वितरणलाई थप व्यवस्थित गरिने छ । यो व्यवस्थाले चाँदीका गहना निकासी गर्न सहज हुने महासंघका अध्यक्ष माणिकरत्न शाक्यले बताए ।
चाँदी, कलात्मक वस्तु आदि निकासी गर्ने व्यापारीका लागि विभागले थप सुविधाको व्यवस्था गरेको विभागले जनाएको छ । विभागका अनुसार अग्रिम भुक्तानी वा प्रॉमिसरी नोट वा विदेशबाट खरिद आदेशको पुष्टि हुने गरी ६० हजार डलरको सीमा लागू हुँदैन । चाँदीका गहना निर्यातकर्ताले एक किलोभन्दा बढी चाँदी किन्न पाउनेछन् ।
अध्यक्ष शाक्यले यसअघि बैंकहरूले चाँदी बिक्रीमा लगाएको एक केजीको सीमा हट्नु सकारात्मक कुरा भएको बताए । चाँदीको कोटा तोकेपछि अहिले भारतबाट ल्याइएको चाँदीले माग पूरा गर्न थालेको छ । कोटा बढाए पनि भारतमा चाँदी सस्तो भएकाले नेपालबाट भारतमा चाँदी निकासी हुने सम्भावना नरहेको शाक्यले बताए ।
