कर्णाली, चैत ९ । कर्णाली प्रदेशका कुल जनसङ्ख्याको ९६ प्रतिशत जनता सुरक्षित र शुद्ध खानेपानीको पहुँचबाट वञ्चित छन् ।
राष्ट्रिय जनगणना–२०७८ को प्रारम्भिक नतिजाअनुसार प्रदेशको कुल १६ लाख ९४ हजार ८८९ जनसङ्ख्यामध्ये चार प्रतिशतले मात्रै शुद्ध खानेपानीको पहुँच पुगेको छ ।
भौतिक पूर्वाधार, ऊर्जा तथा जलस्रोत मन्त्रालयका सिनियर डिभिजनल इन्जिनियर गोपाल शर्माले प्रदेशका ८६ प्रतिशत जनतालाई आधारभूत खानेपानी उपलब्ध गराएको र ६ प्रतिशत जनताले आधारभूत खानेपानीको पहुँच नपाएको बताए ।
शर्माका अनुसार प्रदेशका अधिकांश नागरिक खुला पोखरी, खोला, खोलाको अशुद्ध पानी पिउन बाध्य छन् । ७९ वटै स्थानीय तहमा आधारभूत खानेपानी पुर्याउने लक्ष्यका साथ मन्त्रालयले काम गरिरहेको उनले बताए ।
प्रदेश सरकारले चालु आर्थिक वर्षमा खानेपानी तथा सरसफाइ शीर्षकमा १ अर्ब ४० करोड रुपैयाँ विनियोजन गरेको छ ।
त्यसैगरी कर्णालीका १० वटै जिल्लामा खानेपानी परीक्षण प्रयोगशाला स्थापना भइसकेको छ भने स्थानीय र प्रदेश तहबाट खानेपानीका नयाँ आयोजनाहरु सञ्चालन भइरहेका छन् ।
Published Date: 23 March 2023
