भैरहवा, चैत १ । ओमसतिया गाउँपालिकामा अध्यक्ष कप–२०७९ बुधबारबाट सुरु भएको छ । ओमसतिया गाउँपालिका क्रिकेट खेलाडीको लागि उर्बर भूमि भएको र यहाबाट नयाँ नयाँ खेलाडी उत्पादन गर्ने लक्ष्य सहित अध्यक्ष कप सुरु गरिएको आयोजकको भनाई छ ।
बुधबार भएको उद्घाटन खेलमा ओमसतिया–४ ले ओमसतिया–३ लाई ४ विकेटले पराजित गरेको छ । सुरुमा ब्याटिङ्ग गर्न आएको वडा नम्बर ३ ले निर्धारित १५ ओभर पुरा खेल्दै ९ विकेटको क्षतिमा १ सय २४ बनाएको थियो । उसको लागि मनिराम चौधरीले सर्वाधिक ३५ रन बनाउदा असमान चौधरीले १७ रन र धर्मेन्द्र चौधरीले १६रन बनाए ।
बलिङ्ग तर्फ ओमसतिया ४ का पिन्टु सहानीले ३ विकेट लिए । यस्तै धनन्जय धवल र अमर लिम्बुले समान २÷२ विकेट लिए ।
१ सय २५ रनको लक्ष्य सहित मैदान छिरेको वडा नम्बर ४ लाई धवल दाजुभाईले सहज जित तर्फ ल्याएका थिए । वडा नम्बर ४ का धनन्जय धवलले अर्धशतकिय पारी खेल्दै आफ्नो टिमलाई जित दिलाए । उनले २२ बलमा ५९ रन बनाउन ७ वटा छक्का र २ वटा चौका प्रहार गरेका थिए । यस्तै सन्जय धवलले २७ रन र पिन्टु सहानीको ८ रनको सहयोगमा खेलको १३ औ ओभरमै वडा नम्बर ४ ले निर्धारित लक्ष्य भेटेको थियो ।
बलिङ्ग तर्फ वडा नम्बर ३ का दिपेन्द्र यादव, सुरेन्द्र, चन्दन र शुसिलले समान १-१ विकेट लिएका थिए ।
द राईजिङ्ग क्लब अफ बर्दिहवाको आयोजना तथा ओम सतिया गाउँपालिकाको सहयोगमा प्रतियोगिता चैत्र १ गते देखि ९ गते सम्म सञ्चालन हुनेछ । गाउँपालिकाका ६ वटै वडाका टिम र गाउँपालिकाको दुई टिम गरि प्रतियोगितामा ८ टिम रहेका छन् । प्रतियोगिताको प्रथम पुरस्कार ६० हजार, द्वितिय पुरस्कार ३० हजार रहेको द राईजिङ्ग क्लब अफ बर्दिहवाका अध्यक्ष प्रविन गुप्ताले बताए । यसको साथै प्रतियोगिताको म्यान अफ द म्याच, म्यान अफ द सिरिज, बेस्ट बलर, बेस्ट ब्याटर लगायतलाई पनि पुरस्कृत गरिने गुप्ताले जानकारी दिए ।
भोलीको पहिलो खेल गाउँपालिकाको टिम बि र वडा नम्बर ५ तथा दोश्रो खेल गाउँपालिका टिम ए र वडा नम्बर ६ बिच हुने आयोजकले बताए।
यस अघि प्रतियोगिताको उद्घाटनमा ओमसतियामा राष्ट्रिय स्तरका खेलाडीहरु रहेको र उनीहरुलाई नयाँ पुस्ताले पनि पछ्याउने गरेको कारण युवा खेलाडीहरुलाई यस खेलमा उत्प्रेरित गर्न क्रिकेटको आयोजना गरिएको गाउँपालिकाका अध्यक्ष मन्जित कुमार यादवले बताए । उनले गाउँपालिकाले क्रिकेटलाई मात्र नभई अन्य खेललाई पनि उत्तिकै सम्मान गरेको र अन्य खेलहरु पनि आयोजना गर्दै जाने बताए ।
द राईजिङ्ग क्लब अफ बर्दिहवाका अध्यक्ष प्रविन गुप्ताको अध्यक्षता एवम गाउँपालिकाका अध्यक्ष मन्जित कुमार यादवको प्रमुख आतिथ्यतामा सम्पन्न कार्यक्रममा गाउँपालिकाकी उपाध्यक्ष सुनिता चौधरी, प्रमुख प्रशासकिय अधिकृत विपिन क्षेत्री, वडा नम्बर ५ का वडा अध्यक्ष एवम पालिकाका प्रवक्ता मदन प्रसाद पोखरेल, वडा नम्बर २ का वडा अध्यक्ष शितल जिटी, ३ का प्रकाश सिंह चौधरी, ४ का अखिलेश्वर कुमार पाण्डे, ६ का वडा अध्यक्ष शिव कुमार धवलले बोलेका थिए । कार्यक्रमको सञ्चालन गाउँपालिकाका रोजगार सहायक मनोज कुमार यादवले गरेका थिए ।
