काठमाडौं, फागुन ३० । नवनिर्वाचित राष्ट्रपति रामचन्द्र पौडेललाई चीनले बधाई दिएको छ । नेपालका लागि चिनियाँ राजदूत चेन सोङले चीन सरकारका तर्फबाट राष्ट्रपतिमा निर्वाचित हुनुभएकोमा पौडेललाई बधाई दिँदै सफल कार्यकालको कामना गरेका छन् ।
राजदूत सोङले राष्ट्रपति पौडेलको नेतृत्वमा चीन–नेपाल मित्रता थप प्रगाढ हुने विश्वास व्यक्त गरे ।
त्यसैगरी संघीय लोकतान्त्रिक गणतन्त्र नेपालको नयाँ राष्ट्रपतिमा नियुक्त हुनुभएकोमा रामचन्द्र पौडेललाई अमेरिकाले बधाई दिएको छ ।
‘नेपालका नवनिर्वाचित सम्माननीय राष्ट्रपति रामचन्द्र पौडेललाई बधाई दिन चाहन्छौं,’ काठमाडौंस्थित अमेरिकी दूतावासले जारी गरेको विज्ञप्तिमा भनिएको छ । “संयुक्त राज्य अमेरिकाले उनको सफल कार्यकालको कामना गर्दछ।”
यसअघि भारतीय राष्ट्रपति द्रौपदी मुर्मु र पाकिस्तानी राष्ट्रपति आरिफ अल्भीले राष्ट्रपति पौडेललाई बधाई दिएका थिए ।
नवनिर्वाचित राष्ट्रपति पौडेलले सोमबार पद तथा गोपनियताको सपथ लिएपछि राष्ट्रपति कार्यालय शीतल निवासमा पदभार ग्रहण गरेका हुन् । पौडेल गत चैत २१ गते संघीय संसद र प्रदेशसभा सदस्यसहितको मतदाताको बहुमतबाट राष्ट्रपतिमा निर्वाचित भएका थिए ।
Published Date: 14 March 2023
