मुम्बई, फागुन ३० । भारतकी प्रख्यात गायिका फाल्गुणी पाठक गुजराती परिवारकी सदस्य भए पनि उनको पालन-पोषण भने मुम्बईमा भएको हो ।
फाल्गुणी परिवारकी पाँचौँ सन्तान हुन् । फाल्गुणीका अभिभावकले चार जना छोरीपछि आफ्नो पाँचौं सन्तान छोरा हुन्छ भन्ने अपेक्षा गरेका थिए । तर पाँचौँ सन्तानको रुपमा पनि छोरी कै जन्म भयो ।
यहि कारणले गर्दा फाल्गुणीले आफूलाई कहिले पनि केटी मान्छे झैँ बन्न दिइनन् । उनी सधैँ केटा झैँ देखिने खालका पहिरन लगाउन र हेयर स्टाइल राख्न मन पराउँछिन् । फाल्गुणी कहिले पनि छोरी मान्छे जस्तो भइनन्, उनी सधैँ पुरुष जस्तै भइन् ।
केटाको जस्तै लगाइ–खबाई गर्ने फाल्गुणी अहिलेसम्म अविवाहित छिन् । फाल्गुणीले १० वर्षको कलिलो उमेरमा आफ्नो पहिलो गीत अल्का याज्ञिकसंग रेकर्ड गराएकी थिइन् । सन् ९० को दशकमा फाल्गुणीको गीत हरेकको मुखमा झुण्डिएको थिया । विवाहदेखि अन्य अवसरमा सबैतिर फाल्गुणीको गीत नै बज्ने गर्थ्यो ।
सन् १९८७ मा फाल्गुणीले डान्डिया नाइट्समा गीत गाउन थालिन् । फाल्गुणी केवल गायिका मात्र नभएर लाइभ परफर्मर र म्यूजिक कम्पोजर पनि हुन् । उनको संगीत गुजरातको पारम्परिक संगीतमा आधारित हुन्छ, त्यसैबाट प्रेरित हुन्छ । उनको पहिलो एल्बम १९९८ मा रिलिज भएको थियो । यहिसंगै उनले विभिन्न बलिउड गीत पनि रेकर्ड गराएकी छिन् ।
फाल्गुणीले १९९४ मा ‘ता थैया’ नामक ब्याण्ड बनाएकी थिइन् । यहि ब्याण्डसहित उनले विभिन्न देशमा आफ्नो प्रस्तुति पनि दिएकी छिन् । फाल्गुणीको पहिलो एल्बम सन् १९९८ मा रिलिज भएको थियो र यसका लागि उनले पाँच वर्ष कडा मेहिनत गरेकी थिइन् ।
