काठमाडौं, फागुन २५ । जावलाखेल युथ क्लबले नयाँ सिजनको सहिद स्मारक ‘ए’ डिभिजन लिग फुटबलमा एनआरटीलाई २-१ गोल अन्तरले हराउँदै लगातार दोस्रो जित निकालेको छ ।
एन्फा कम्प्लेक्स सातदोबाटोमा आज भएको खेलमा न्युरोड टिम (एनआरटी)लाई २-१ गोल अन्तरले हराउँदै जावलाखेलले लगातार दोस्रो जितको यात्रा कायम राखेको हो ।
जावलाखेलको जितमा खेलको ६८ औं मिनेटमा सिमान्तले गोल गर्दै जावलाखेललाई सुरुआती अग्रता दिलाएका थिए त्यसै खेलको ७७ औं मिनेटमा फोफानाले गोल गर्दा जावलाखेल २-० ले अघि रहेको थियो ।
त्यसपछि खेलको ८० औं मिनेटमा दोस्रो हाफमा मैदान छिरेका एनआरटीका सन्जिबले गोल गरेपनि जावलाखेल २-१ ले विजयी भयो ।
जितसँगै जावलाखेलले २ खेलमा ६ अंक जोड्दै अंक तालिकाको दोस्रो स्थानमा उक्लिएको छ।
त्यसैगरि च्यासल मैदानमा भएको लिग को अर्को खेलमा त्रिभुवन आर्मी क्लबले साविक विजेता मछिन्द्र फुटबल क्लबलाइ २-० गोल अन्तरले हराउँदै जित निकालेको छ। आर्मीका लागि दिपक गुरुङ र नवयुग श्रेष्ठले एक एक गोल गरे ।
जितसँगै आर्मीले २ खेलमा ४ अंक जोड्दै चौंथो स्थानमा उक्लिएको छ ।
