काठमाडौं, फागुन २४ । राष्ट्रपति विद्यादेवी भण्डारीले महिला सशक्तिकरण र लैङ्गिक समानतामा नेपालले हासिल गरेका उपलब्धि विश्व महिला आन्दोलनका लागि अनुपम रहेको बताएकी छिन् । तर, महिला नेतृत्व विकास, अवसरको समतामूलक पहुँच र वितरणका साथै आर्थिक प्रगतिका लागि लामो यात्रा गर्न बाँकी छ ।
११३औँ अन्तर्राष्ट्रिय महिला दिवसका अवसरमा आज एक सन्देश जारी गर्दै राष्ट्रपति भण्डारीले स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइमा सुख, शान्ति र समृद्धिको कामना गरेकी हुन्।
संरचनाका आधारमा महिलाको सहभागिता र प्रतिनिधित्व सुनिश्चित गर्न संविधानले तोकेका प्रावधानका सकारात्मक परिणामका पक्षहरूलाई आन्तरिक रूप दिनु सान्दर्भिक छ । “यसको फलस्वरूप तीनै तहका सरकार, संसद र नीति निर्माण निकायमा महिलाको भूमिका सुदृढ भएको छ र यसबाट नेपाली महिलाको गरिमा माथि उठेको छ भन्ने मलाई लाग्छ,” राष्ट्रपतिको सन्देशमा भनिएको छ ।
राष्ट्रपतिले यस दिवसले समाजमा विद्यमान सबै सामाजिक विकृतिका साथै महिलाविरुद्ध हुने सबै प्रकारका हिंसा, भेदभाव र दमनको अन्त्य गरी समानता र न्याय सुनिश्चित गर्न सबैमा ऊर्जा र उत्साह थप्ने विश्वास व्यक्त गरेकी हुन्।
लैङ्गिक समानताको मुख्य उद्देश्य राष्ट्र, समाज र महिला र पुरुषको परिवारप्रति समान अधिकार र उत्तरदायित्व बाँडफाँड गर्ने वातावरण सिर्जना गर्नु रहेको राष्ट्रपतिले सन्देशमा उल्लेख गरेकी हुन्।
