ङातापोल्हँ मन्दिरको ३२४औँ वर्षबन्धन आज मनाइँदै

भक्तपुर, असार ३१ । भक्तपुरको ऐतिहासिक तथा सांस्कृतिक सम्पदामध्ये एक मानिने ङातापोल्हँ मन्दिरको ३२४औँ वर्षबन्धन आज विविध कार्यक्रमका साथ मनाइँदै छ।

नेपाल संवत् ८२२ को आषाढ शुक्ल प्रतिपदाका दिन (सन् १७०२) निर्माण सम्पन्न भएको यो मन्दिर तीन शताब्दीभन्दा लामो समयदेखि भक्तपुरको धार्मिक, सांस्कृतिक तथा ऐतिहासिक पहिचानका रूपमा अविचलित रूपमा उभिएको छ। मन्दिरमा सिद्धिलक्ष्मी विराजमान रहेको विश्वास गरिन्छ।

ङातापोल्हँ मन्दिर भक्तपुरका प्रमुख सम्पदामध्ये एक हुनुका साथै स्वदेशी तथा विदेशी पर्यटकहरूको आकर्षणको केन्द्र पनि हो। परम्परागत नेवारी कला, काष्ठकला तथा वास्तुकलाको उत्कृष्ट नमुनाका रूपमा परिचित यो मन्दिर भक्तपुरको गौरवका रूपमा स्थापित छ।

यस वर्षबन्धनका अवसरमा स्थानीयवासी, भक्तजन तथा सम्पदा संरक्षणसँग सम्बन्धित व्यक्तिहरूले मन्दिरको संरक्षण, प्रवर्द्धन तथा यसको ऐतिहासिक महत्त्वलाई थप उजागर गर्ने प्रतिबद्धता व्यक्त गरेका छन्।

ङातापोल्हँ मन्दिरको ३२४औँ वर्षबन्धन २०८३ असार ३१ गते बुधबार (नेपाल संवत् ११४६ दिल्लाथ्व प्रतिपदा) परेको हो।